Chandrababu: మాచర్లలో వైసీపీపై విరుచుకుపడ్డ చంద్రబాబు..

ఆంధ్రప్రదేశ్ (Andhra Pradesh) రాజకీయాల్లో ప్రస్తుతం ముఖ్యమంత్రి నారా చంద్రబాబు నాయుడు (Chandrababu Naidu) తన దూకుడు కొనసాగిస్తున్నారు. నాలుగోసారి సీఎం బాధ్యతలు చేపట్టినప్పటి నుంచి ఆయన ప్రతి వేదికను అవకాశంగా మార్చుకుని ప్రజలతో నేరుగా మాట్లాడుతున్నారు. ఎన్నికలు దగ్గరలో లేని సమయంలోనే ప్రతిపక్షంపై తీవ్ర స్థాయిలో విమర్శలు చేయడం ఆయన శైలి మారిందనడానికి నిదర్శనంగా భావిస్తున్నారు.

తాజాగా మాచర్ల (Macherla) లో జరిగిన “స్వర్ణాంధ్ర-స్వచ్ఛ ఆంధ్ర” కార్యక్రమంలో పాల్గొన్న చంద్రబాబు, ప్రజా వేదిక నుంచి చేసిన ప్రసంగంతో మరోసారి దృష్టిని ఆకర్షించారు. ప్రత్యేకంగా వైసీపీ (YCP) పేరును ఉటంకించకపోయినా ప్రత్యక్ష ప్రతిపక్షంపై ఆయన పరోక్ష వ్యాఖ్యలు గట్టిగానే వినిపించాయి. కొందరు నియంతల మాదిరిగా ప్రవర్తిస్తున్నారని, ప్రజలు ఇలాంటి తీరును భరించరని ఆయన చెప్పారు. గతంలో మాచర్లలో రౌడీలు సృష్టించిన విధ్వంసాన్ని గుర్తు చేస్తూ, ఇప్పుడు తమ పాలనలో ప్రజలకు నిజమైన స్వాతంత్ర్యం వచ్చిందని అన్నారు.

చంద్రబాబు తన ప్రసంగంలో మునుపటి పాలనలో ఎదుర్కొన్న అనుభవాలను కూడా గుర్తు చేశారు. తాను మాచర్లకు రావాలనుకుంటే తన ఇంటికి తాళాలు వేసి అడ్డుకున్నారని, కానీ ఇప్పుడు ఆ తాళాలు వేసినవారు ఇప్పుడు తమ మెడలకు ఉరితాళ్లు వేసుకునే పరిస్థితి మారిందని ఆయన వ్యంగ్యంగా వ్యాఖ్యానించారు. ఇకపై రౌడీయిజం, విధ్వంసం ఎట్టి పరిస్థితుల్లో సహించబోమని, తప్పిదాలకు తగిన చర్యలు తప్పవని ఆయన కఠిన హెచ్చరిక జారీ చేశారు.

ఈ సందర్బంగా రాజకీయాల్లో ఉన్న చెత్త గురించి కూడా ఆయన ప్రస్తావించారు. మన పరిసరాల్లో ఉన్న చెత్తను మాత్రమే కాకుండా, రాజకీయ చెత్తను కూడా శుభ్రం చేయాల్సిన సమయం వచ్చిందని అన్నారు. గత పాలకులు 85 లక్షల మెట్రిక్ టన్నుల చెత్తను రాష్ట్రంలో అలాగే వదిలేశారని, అంతేకాక ఆ చెత్తపై కూడా పన్నులు వేసి ప్రజలపై భారం మోపారని గుర్తు చేశారు. ఇప్పుడు ప్రభుత్వం ఆ చెత్తను తొలగించడం మాత్రమే కాదు, చెత్త రాజకీయాలను కూడా దూరం చేస్తుందని చంద్రబాబు స్పష్టం చేశారు.

మాచర్లలో జరిగిన సభలో ఆయన చెప్పిన ఈ మాటలు అక్కడి ప్రజలకు ఉత్తేజాన్ని కలిగించాయి. ప్రజాస్వామ్యం నిజంగా ఇక్కడ పునరుద్ధరించబడిందని, ఇకపై ఈ స్వాతంత్ర్యం శాశ్వతం అవుతుందని ఆయన హామీ ఇచ్చారు. అందరూ కలిసి రాష్ట్రాన్ని శుభ్రపరచుకోవాలని, అభివృద్ధి మార్గంలో ముందుకు నడవాలని పిలుపునిచ్చారు.

మొత్తానికి, “రాజకీయ చెత్త” అన్న పదజాలం ఆయన ప్రసంగంలో ప్రత్యేకంగా నిలిచింది. దీనిపై సోషల్ మీడియాలో చురుకైన చర్చ మొదలైంది. రాజకీయ వర్గాల్లోనూ, ప్రజల్లోనూ చంద్రబాబు వ్యాఖ్యలు విశేషంగా వినిపిస్తున్నాయి. ఆయన దూకుడు యథావిధిగా కొనసాగుతుండటంతో ప్రతిపక్షం ఎలా ప్రతిస్పందిస్తుందనే ఆసక్తి పెరుగుతోంది.