Siddaramaiah: కర్నాటక సీఎంగా నేనే ఉంటా..హై కమాండ్ క్లారిటీ కోరిన సిద్ధరామయ్య..!

కర్నాటక కాంగ్రెస్ లో సీఎం అనిశ్చితి అంశం మరోసారి తెరపైకి వచ్చింది. కొద్దిరోజులుగా తాను సీఎం కావాలని భావిస్తున్నట్లు డిప్యూటీ సీఎం డికె శివకుమార్ వ్యక్తపరుస్తున్నారు. ఆయన వర్గం ఎమ్మెల్యేలు సైతం.. తమ నేత సీఎంగా అవుతారని ప్రకటిస్తున్నారు. అయితే శివకుమార్ మాత్రం హైకమాండ్ మాటే తమకు శిరోధార్యమంటున్నారు. కాంగ్రెస్ హైకమాండ్ ఏమీ తేల్చకుండా .. పరిస్థితుల్ని గమనిస్తోంది.దీంతో పార్టీ కేడర్ తో పాటు సిద్ధరామయ్య, డికె శివకుమార్ సైతం గందరగోళాన్ని ఎదుర్కొంటున్నారు.

కాంగ్రెస్ అగ్రనేత రాహుల్‌ గాంధీ మంగళవారం మైసూరులో ముఖ్యమంత్రి సిద్ధరామయ్య, ఉప ముఖ్యమంత్రి డీకే శివకుమార్‌తో సమావేశమయ్యారు. ఈ నేపథ్యంలో రాష్ట్రంలో సీఎం మార్పు అంశం (CM issue) మళ్లీ చర్చకు వచ్చింది. రాహుల్‌తో భేటీలో సీఎం మార్పు అంశంపై స్పష్టతనివ్వాలని సిద్ధరామయ్య (Siddaramaiah) ఆయనను కోరినట్లు పార్టీ వర్గాలు వెల్లడించాయి. అధికార మార్పు విషయంలో రాష్ట్ర ప్రజలు, పార్టీ, నేతలు కార్యకర్తలు గందరగోళానికి గురవుతున్నారని.. దీనిపై వారికి స్పష్టతనివ్వాల్సిన అవసరం ఉందని పేర్కొన్నట్లు సమాచారం.

గత నవంబరు 20తో సిద్ధరామయ్య సర్కారుకు రెండున్నరేళ్ల గడువు ముగిసిన నేపథ్యంలో సిద్ధు, డీకే మద్దతుదారులు అదే పనిగా ఢిల్లీలో కాంగ్రెస్‌ నేతలతో సమావేశమవుతున్నారు. సిద్ధరామయ్య, డీకే అల్పాహార భేటీల పేరుతో మద్దతుదారులతో సమావేశమవడం, తాను సీఎం కావాలనే కోరికను శివకుమార్‌ పలుమార్లు పరోక్షంగా వ్యక్తపరుస్తుండడంతో కర్ణాటకలో సీఎం మార్పు ఉంటుందనే వార్తలు చక్కర్లు కొడుతున్నాయి. ఈ సమయంలో రాహుల్‌ (Rahul Gandhi) కర్ణాటకకు వెళ్లడం ప్రాధాన్యం సంతరించుకుంది. అయితే రాహుల్‌గాంధీతో తాము మర్యాదపూర్వకంగానే భేటీ అయినట్లు సిద్ధరామయ్య పేర్కొన్నారు. మంత్రివర్గ విస్తరణపై త్వరలో రాహుల్‌తో మరోసారి సమావేశమవ్వనున్నట్లు తెలిపారు.