Trump: అమెరికన్లపై ట్రంప్ సమ్మోహనాస్త్రం.. మధ్యంతర ఎన్నికలే టార్గెట్..?

ఇటీవలి కాలంలో అగ్రరాజ్యాధినేతగా .. ప్రపంచాధిపత్యంపై ఫోకస్ పెట్టిన అమెరికా అధ్యక్షుడు ట్రంప్.. ఇప్పుడు ఇల్లు చక్కదిద్దుకునే పనిలో పడ్డారు. త్వరలో మధ్యంతర ఎన్నికలు రానుండడంతో.. ప్రజాకర్షణ పెంచుకునేందుకు సంక్షేమ పథకాల ప్రకటనలు చేశారు. దీనిలో భాగంగా కీలక ప్రతిపాదనలు ఆవిష్కరించారు. డెట్రాయిట్ ఎకనామిక్ క్లబ్‌లో మంగళవారం జరిగిన సమావేశంలో ట్రంప్ ప్రసంగించారు

అమెరికాలో పెరుగుతున్న జీవన వ్యయాన్ని తగ్గించేందుకు తమ ప్రభుత్వం నూతన చర్యలు చేపడుతోందని అమెరికా అధ్యక్షుడు డొనాల్డ్ ట్రంప్ ప్రకటించారు. గృహ, ఆరోగ్య సంరక్షణ, వినియోగదారుల ఖర్చులను తగ్గించడమే లక్ష్యంగా కీలక ప్రతిపాదనలు చేశారు.తగ్గుతున్న ఇంధన ధరల ప్రభావంతో పాటు మార్ట్‌గేజ్‌లు, క్రెడిట్ కార్డులు, ఔషధాల ధరల విషయంలో ప్రతిపాదిత మార్పులను ఆయన ప్రముఖంగా ప్రస్తావించారు.

ప్రజల జీవన వ్యయాన్ని తగ్గించడం తమ ప్రభుత్వ ప్రధాన ప్రాధాన్యత అని ఆయన స్పష్టం చేశారు. తగ్గుతున్న ఇంధన ధరలే ఇతర ధరల తగ్గుదలకు ప్రధాన కారణమని ఆయన వాదించారు. “దేశంలోని 17 రాష్ట్రాల్లో గ్యాసోలిన్ ధర గ్యాలన్‌కు $2.50 కంటే తక్కువకు పడిపోయింది. చాలా చోట్ల ఇది $2 లోపే ఉంది. గ్యాసోలిన్ ధరలు తగ్గినప్పుడు, అన్ని వస్తువుల ధరలు తగ్గుతాయి” అని ఆయన వివరించారు.

గృహ కొనుగోలును మరింత అందుబాటులోకి తీసుకురావడంపై తమ ప్రభుత్వం దృష్టి సారిస్తుందని ట్రంప్ తెలిపారు. “సింగిల్-ఫ్యామిలీ ఇళ్లను పెద్ద సంస్థాగత పెట్టుబడిదారులు కొనుగోలు చేయకుండా నిషేధం విధిస్తాం” అని ఆయన పేర్కొన్నారు. దీంతో పాటు, మార్ట్‌గేజ్ రేట్లను తగ్గించేందుకు అమెరికా ప్రభుత్వం $200 బిలియన్ల విలువైన మార్ట్‌గేజ్ బాండ్లను కొనుగోలు చేస్తున్నట్లు ప్రకటించారు. “చాలా ఏళ్ల తర్వాత, గత వారమే 30 ఏళ్ల మార్ట్‌గేజ్ రేటు 6 శాతం కంటే కిందకు పడిపోయింది” అని ఆయన తెలిపారు. ఫెడరల్ రిజర్వ్ సహాయం లేకుండానే ఈ మార్పు సాధ్యమైందని ఆయన అన్నారు.

క్రెడిట్ కార్డులు, ఆరోగ్య సంరక్షణపై హామీలు

వినియోగదారులపై భారం మోపుతున్న క్రెడిట్ కార్డు వడ్డీ రేట్లపైనా ట్రంప్ స్పందించారు. “క్రెడిట్ కార్డు కంపెనీలు వడ్డీ రేట్లను ఏడాది పాటు 10 శాతానికి పరిమితం చేయాలని నేను గర్వంగా పిలుపునిచ్చాను” అని తెలిపారు. ప్రస్తుతం కంపెనీలు 28 నుంచి 32 శాతం వరకు వడ్డీని వసూలు చేస్తున్నాయని ఆయన అన్నారు.

ఆరోగ్య సంరక్షణ రంగంలో, అఫర్డబుల్ కేర్ యాక్ట్‌ను “భయంకరమైన చట్టం”గా అభివర్ణిస్తూ దానిపై తీవ్రంగా విమర్శలు చేశారు. ఆ చట్టం వినియోగదారులకు కాకుండా బీమా కంపెనీలకు లాభం చేకూర్చిందని ఆరోపించారు. ప్రభుత్వ సాయం నేరుగా ప్రజలకే అందాలని, తద్వారా వారు తమకు నచ్చిన ఆరోగ్య సంరక్షణను కొనుగోలు చేసుకోగలరని చెప్పారు. ఈ వారంలోనే “హెల్త్ కేర్ అఫర్డబిలిటీ ఫ్రేమ్‌వర్క్”ను ప్రకటిస్తానని తెలిపారు.

“మోస్ట్ ఫేవర్డ్ నేషన్” విధానం ద్వారా ఔషధాల ధరలను భారీగా తగ్గిస్తామని ట్రంప్ హామీ ఇచ్చారు. “ప్రపంచంలో ఏ దేశం అత్యల్ప ధరకు మందులను కొనుగోలు చేస్తుందో, అదే ధరకు మనం కూడా కొంటాం” అని ఆయన స్పష్టం చేశారు. ఈ విధానానికి అంగీకరించని దేశాలపై టారిఫ్‌లు విధిస్తామని హెచ్చరించారు.

ఆర్థిక వృద్ధి బలంగా ఉన్నప్పటికీ ధరలు తగ్గుతున్నాయని, ఇది అద్భుతమైన పరిణామమని ట్రంప్ పేర్కొన్నారు. కిరాణా సరుకులు, అద్దెలు, విమాన ఛార్జీలు, హోటల్ రేట్లు కూడా వేగంగా తగ్గుతున్నాయని, అదే సమయంలో వేతనాలు పెరుగుతున్నాయని ఆయన అన్నారు. బైడెన్ హయాంలో తగ్గిన నిజ వేతనాలు, తమ ప్రభుత్వంలో ఏడాదిలోనే $1,300 పెరిగాయని ఆయన చెప్పుకొచ్చారు.