Trump: త్రైపాక్షిక చర్చల దిశగా ట్రంప్ ఆలోచన.. అప్రమత్తమైన యూరోపియన్ దేశాలు..

ఉక్రెయిన్ లో యుద్ధాన్ని ఆపేందుకు ట్రంప్ .. పట్టువదలని విక్రమార్కుడిలా ప్రయత్నాలుచేస్తూనే ఉన్నారు. ఎప్పుడైతే అలస్కాలో పుతిన్ తో భేటీ అయ్యారో… అక్కడితో యుద్ధానికి సంబంధించిన వాస్తవాలు ట్రంప్ అండ్ కోకు అర్థమైనట్లు కనిపిస్తోంది. దీంతో ఇది మధ్యవర్తులతో జరిగే పని కాదని… నేరుగా రష్యా, ఉక్రెయిన్ అధినేతలు కూర్చుని మాట్లాడుకుంటే మంచిదన్న అభిప్రాయానికి వచ్చారు ట్రంప్. ఆదిశగా ప్రయత్నాలు సాగిస్తున్నారు కూడా..

ముగ్గురు అధ్యక్షుల మధ్య ఈ సమావేశం (Trilateral Meet) ఆగస్టు 22న ఏర్పాటు చేయాలని అమెరికా అధ్యక్షుడు యోచిస్తున్నట్లు ఆ దేశ మీడియా సంస్థలు తెలిపాయి. పుతిన్‌తో సమావేశం అనంతరం ఈ విషయాన్ని ట్రంప్‌ యూరోపియన్‌ నాయకులతో చెప్పినట్లు సమాచారం. మరో వైపు ఉక్రెయిన్‌ అధ్యక్షుడు జెలెన్‌స్కీ సోమవారం ట్రంప్‌తో భేటీ అవ్వనున్నారు. ఈ సమావేశానికి (Trilateral Meet) యూరోపియన్ దేశాల నాయకులను కూడా ట్రంప్‌ ఆహ్వానించినట్లు సంబంధిత వర్గాలు పేర్కొన్నాయి. సోమవారం ట్రంప్‌, జెలెన్‌స్కీల మధ్య సమావేశం జరిగిన అనంతరం ముగ్గురు నేతల మధ్య త్రైపాక్షిక మీటింగ్‌ జరిగే అవకాశం ఉందని జర్మన్ ఛాన్సలర్ ఫ్రెడరిక్ మెర్జ్ తెలిపారు.యుద్ధం ముగింపుపై సోమవారం కీలక ప్రకటన వెలువడుతుందని భావిస్తున్నారు.

ఉక్రెయిన్‌తో యుద్ధం గురించి ఇటీవల అలాస్కా వేదికగా ట్రంప్‌, పుతిన్‌లు భేటీ అయ్యి రెండున్నర గంటలకు పైగా చర్చించారు. అయినప్పటికీ ఎలాంటి ఒప్పందానికి రాలేదు. అయితే, చర్చలు సానుకూలంగా జరిగాయని ఇరువురు నేతలు ప్రకటించారు. సమావేశం గురించి ట్రంప్‌ మాట్లాడుతూ.. ఒప్పందంపై నిర్ణయం జెలెన్‌స్కీ చేతుల్లోనే ఉందన్నారు. అనంతరం అమెరికా అధ్యక్షుడు తనతో ఫోన్‌లో మాట్లాడినట్లు ఉక్రెయిన్‌ అధినేత తెలిపారు. త్రైపాక్షిక సమావేశంపై ట్రంప్‌ చేసిన ప్రతిపాదనకు తాను మద్దతిస్తున్నట్లు వెల్లడించారు. కీలక అంశాలపై చర్చించుకునేందుకు అది మంచి వేదిక అవుతుందన్నారు. పరిస్థితులను చక్కదిద్దే బలం అమెరికాకు ఉందని ఈ సందర్భంగా వ్యాఖ్యానించారు. శాంతి ఒప్పందంపై ఉక్రెయిన్‌కు మద్దతుగా నిలుస్తున్న యూరోపియన్‌ నాయకులకు జెలెన్‌స్కీ కృతజ్ఞతలు తెలిపారు.

జెలెన్‌స్కీకి మద్దతుగా యూరప్‌ నేతలు..

సోమవారం వాషింగ్టన్‌ డీసీలో ట్రంప్‌తో జెలెన్‌స్కీ సమావేశమవ్వనున్న నేపథ్యంలో యూరప్ నేతలు అప్రమత్తమయ్యారు. గతంలో అమెరికా అధ్యక్షుడితో సమావేశమైన జెలెన్‌స్కీకి చేదు అనుభవం ఎదురైన విషయం తెలిసిందే. ఈ ఘటన పునరావృతం కాకుండా ఉండేందుకు ట్రంప్‌తో స్నేహపూర్వకంగా మెలిగే ఫిన్‌లాండ్‌ అధ్యక్షుడు అలెగ్జాండర్ స్టబ్‌, ఇతరులను ఉక్రెయిన్‌ అధ్యక్షుడికి సాయంగా వాషింగ్టన్‌కు పంపనున్నట్లు యూరప్‌ దౌత్యవేత్తలు తెలిపారు. ఇరువురి మధ్య ఘర్షణ పునరావృతం కాకుండా, చర్చలు సజావుగా జరిగేలా వీరు చూసుకోనున్నట్లు సమాచారం. నాటో సెక్రెటరీ జనరల్‌ కూడా ఈ సమావేశంలో పాల్గొనే అవకాశం ఉందని సమాచారం.