గుణశేఖర్ ‘శాకుంతలం’ ఫాన్సీ రేట్ తో కొనుగోలు చేసిన అమెజాన్ ప్రైమ్ వీడియో
స్టార్ హీరోయిన్ సమంత నటించిన మైథలాజికల్ మూవీ ‘శాకుంతలం’ ఫిబ్రవరి 17 న విడుదల కానుంది. ఇదే క్రమంలో చిత్ర డిజిటల్ రైట్స్‌పై ఇంట్రెస్టింగ్ అప్‌డేట్ వచ్చేసింది. ప్రముఖ స్ట్రీమింగ్ సంస్థ ఓటీటీ హక్కులను దక్కించుకుంది. సీనియర్ దర్శకుడు గుణశేఖర్ ప్రతిష్టాత్మకంగా తెరకెక్కించిన మైథలాజికల్ మూవీ ‘శాకుంతలం’ . టాలీవుడ్ స్టార్ హీరోయిన్ సమంత లీడ్ రోల్ పోషించిన ఈ చిత్రాన్ని గుణ టీమ్ వర్క్స్ బ్యానర్‌పై నీలిమ గుణ నిర్మించారు. శకుంతల, దుష్యంతుల ప్రేమ కావ్యంగా కాళిదాసు రచన ఆధారంగా రూపొందిన ఈ మూవీ ఫిబ్రవరి 17న విడుదల కానుంది. ఇటీవలే విడుదలైన ట్రైలర్ ప్రామిసింగ్‌గా ఉండటంతో మూవీపై ప్రేక్షకుల్లో హైప్ ఏర్పడింది. ఇందులో సమంత టైటిల్ రోల్ పోషించగా.. మలయాళ నటుడు దేవ్ మోహన్ దుష్యంతుడిగా కనిపించనున్నాడు.
కాగా ఈ మూవీ డిజిటల్ రైట్స్‌కు సంబంధించిన అప్‌డేట్ నెట్టింట చక్కర్లు కొడుతోంది. ప్రముఖ స్ట్రీమింగ్ సంస్థ భారీ ధరకు ఈ హక్కులు కొనుగోలు చేసినట్లు తెలుస్తోంది. ఈ సినిమా OTT హక్కులను ప్రముఖ స్ట్రీమింగ్ సర్వీస్ అమెజాన్ ప్రైమ్ వీడియో దక్కించుకుందని సమాచారం. అయితే ఇందుకు సంబంధించి మేకర్స్ నుంచి అధికారిక ప్రకటన రావాల్సి ఉంది. ఇక ఈ సినిమా ఎప్పుడో విడుదల కావాల్సి ఉన్నప్పటికీ వీఎఫ్‌ఎక్స్ పనుల కారణంగా వాయిదా పడుతూ వచ్చింది. ప్రస్తుతం అన్నీ పక్కాగా కుదరడంతో ఫిబ్రవరి 17న విడుదల కానుంది. కాగా దర్శకుడు గుణశేఖర్ ఇప్పటికే ‘రుద్రమదేవి’ లాంటి చారిత్రాత్మక సినిమాను సమర్థవంతంగా తెరకెక్కించినందున ఈ సినిమాపై ప్రేక్షకుల్లో భారీ అంచనాలున్నాయి. ఇదిలా ఉంటే, శాకుంతలం చిత్రంలో మోహన్ బాబు, ప్రకాష్ రాజ్, అదితి బాలన్, గౌతమి, అనన్య నాగళ్ల, కబీర్ దుహన్ సింగ్ కీలక పాత్రలు పోషించారు. గుణ టీమ్ వర్క్స్ పతాకంపై నీలిమ గుణ నిర్మిస్తున్న ఈ చిత్రం తెలుగు, తమిళం, హిందీ, మలయాళం, కన్నడ భాషల్లో 2డి, 3డి ఫార్మాట్లలో విడుదల కానుంది.
ఇక శాకుంతలంలో ఇంట్రెస్టింగ్ పాయింట్స్ విషయానికొస్తే.. అల్లు అర్జున్ కూతురు అర్హ చైల్డ్ ఆర్టిస్ట్‌గా నటించింది. ఇదే తనకు మొదటి సినిమా కాగా.. బాల భరతుడి పాత్రలో కనిపించనుంది. ఆల్రెడీ ట్రైలర్‌లో సింహంపై స్వారీ చేస్తున్న విజువల్ నెట్టింట వైరల్ అవుతోంది. అంతేకాదు అర్హ ఈ మధ్యే తన పాత్రకు డబ్బింగ్ చెబుతున్న పిక్‌ను సోషల్ మీడియాలో షేర్ చేశాడు బన్నీ. మరోవైపు హీరోయిన్ సమంతకు ఈ చిత్రం చాలా ఇంపార్టెంట్ కానుంది. ఇన్నాళ్లూ మయోసైటిస్ వ్యాధితో బాధపడిన సామ్.. ఇప్పుడిప్పుడే తిరిగి తన పెండింగ్ ప్రాజెక్టులపై ఫోకస్ చేస్తోంది. ఈ సమయంలో ‘శాకుంతలం’ విజయం తనకు ఖచ్చితంగా కొత్త ఉత్సాహాన్ని ఇవ్వగలదని ఆశిద్దాం.
