BRS vs Congress: సవాళ్లకే పరిమితమైన పార్టీలు.. చర్చలకు మాత్రం దూరం..!

తెలంగాణ రాజకీయ రంగంలో అధికార కాంగ్రెస్ (Congress), ప్రతిపక్ష భారత రాష్ట్ర సమితి (BRS) మధ్య నీటిపారుదల రంగంపై వివాదం రోజురోజుకూ తీవ్రమవుతోంది. రాష్ట్ర నీటి హక్కులు, రైతు సంక్షేమం, పరిపాలనా సామర్థ్యంపై రెండు పార్టీలు ఒకరిపై ఒకరు తీవ్ర ఆరోపణలు చేసుకుంటూ మాటల యుద్ధాన్ని ఉధృతం చేశాయి. ఈ వివాదం చర్చా సవాళ్లు, వేదికల గందరగోళం, వ్యక్తిగత విమర్శలతో రాష్ట్ర ప్రజల దృష్టిని ఆకర్షిస్తోంది. నీటిపారుదల రంగంలో తెలంగాణకు అన్యాయం జరిగిందని, దీనికి BRS గత పదేళ్ల పాలనే కారణమని సీఎం రేవంత్ రెడ్డి (CM Revanth Reddy) కొన్నిరోజుల కిందట విమర్శించారు. కాళేశ్వరం ప్రాజెక్టులో అవినీతి, మేడిగడ్డ బ్యారేజీలో నిర్వాకం కారణంగా రైతులకు సాగునీరు అందలేదని, రాష్ట్ర నీటి వాటాలను BRS రక్షించలేకపోయిందని ఆరోపించారు.

ఈ అంశంపై బహిరంగ చర్చకు రావాలని BRS వర్కింగ్ ప్రెసిడెంట్ కేటీఆర్ (KTR) సవాల్ విసిరారు. జులై 8న సోమాజిగూడ ప్రెస్ క్లబ్‌లో నీటిపారుదల, రైతు సంక్షేమంపై చర్చకు రావాలని రేవంత్‌ను ఆహ్వానించారు. ముందే చెప్పినట్లు KTR నేతృత్వంలో BRS నేతలు ప్రెస్ క్లబ్‌కు చేరుకుని చర్చకు సిద్ధమయ్యారు. అయితే, కాంగ్రెస్ నేతలు ప్రెస్ క్లబ్‌కు హాజరు కాలేదు. బదులుగా BRS అధినేత కేసీఆర్ (KCR)ను అసెంబ్లీలో చర్చకు రావాలని కాంగ్రెస్ నేతలు డిమాండ్ చేశారు. కొంతమంది కాంగ్రెస్ ఎమ్మెల్యేలు అసెంబ్లీకి వెళ్లి BRS నేతల కోసం ఎదురుచూస్తున్నట్టు ప్రకటించారు. కానీ, BRS నేతలు అసెంబ్లీకి రాలేదు. ఈ వేదికల వివాదంతో చర్చ జరగకపోగా, రెండు పార్టీల మధ్య ఆరోపణలు మరింత ఉధృతమయ్యాయి.

సీఎం రేవంత్ రెడ్డి చర్చకు రాకుండా ఢిల్లీకి పారిపోయారని కేటీఆర్ విమర్శించారు. కాంగ్రెస్ ప్రభుత్వం రైతు రుణమాఫీ, రైతు భరోసా వంటి హామీలను నెరవేర్చలేదని, రైతులు ఆత్మహత్యలకు పాల్పడుతున్నారని ఆరోపించారు. BRS హయాంలో రైతు బంధు, 24 గంటల ఉచిత విద్యుత్ వంటి పథకాలతో రైతులను ఆదుకున్నామని, అసెంబ్లీలో మైక్‌లు కట్ చేయకుండా చర్చకు సిద్ధమని KTR పేర్కొన్నారు. KCR నాయకత్వంలో తెలంగాణ అభివృద్ధి చెందిందని, రేవంత్ తప్పుకుంటే మళ్లీ అభివృద్ధి చేసి చూపిస్తామని సవాల్ చేశారు.

అయితే KTR విమర్శలను కాంగ్రెస్ నేతలు తిప్పికొట్టారు. KCRను చర్చకు పిలిస్తే KTR ఎందుకు ఉలికిపడుతున్నారని, రేవంత్‌తో చర్చించే స్థాయి KTRకు లేదని ఎద్దేవా చేశారు. BRS పాలనలో కాళేశ్వరం ప్రాజెక్టులో రూ.లక్ష కోట్ల అవినీతి జరిగిందని, మేడిగడ్డ బ్యారేజీ కుంగిపోవడం, కన్నెపల్లి పంపుహౌస్‌లో లోపాలు ఏర్పడడం BRS నిర్వాకానికి నిదర్శనమని ఆరోపించారు. కాంగ్రెస్ 18 నెలల్లో రూ.2 లక్షల కోట్ల రుణమాఫీ చేసిందని, 283 లక్షల మెట్రిక్ టన్నుల ధాన్యం ఉత్పత్తి సాధించిందని గుర్తు చేశారు. BRS నీటి సెంటిమెంట్‌ను రాజకీయంగా వాడుకుంటోందని, తెలంగాణ నీటి హక్కులను కాపాడేందుకు కాంగ్రెస్ కట్టుబడి ఉందని పేర్కొన్నారు.

ఈ వివాదంలో రెండు పార్టీలూ రైతు సంక్షేమం, నీటిపారుదల రంగంలో తమ పనితీరును నిరూపించుకోవడానికి పోటీపడుతున్నాయి. అయితే, చర్చా వేదికపై ఏకాభిప్రాయం కుదరకపోవడం, వ్యక్తిగత ఆరోపణలు ప్రజల దృష్టిని సమస్యల నుంచి మళ్లిస్తున్నాయని విశ్లేషకులు అభిప్రాయపడుతున్నారు. నీటిపారుదల రంగంలో సవాళ్లు, రైతుల సమస్యల పరిష్కారానికి రాజకీయ విమర్శలకు దూరంగా నిర్మాణాత్మక చర్చ అవసరమని సూచిస్తున్నారు.