Jagan Padayatra: మళ్లీ పాదయాత్రకు సిద్ధమవుతున్న జగన్..! సవాళ్ల సంగతేంటి..?

ఆంధ్రప్రదేశ్ రాజకీయాల్లో మరోసారి ఆసక్తికర పరిణామం చోటు చేసుకుంటోంది. వైయస్సార్ కాంగ్రెస్ పార్టీ (YSRCP) అధ్యక్షుడు, మాజీ ముఖ్యమంత్రి వై.ఎస్. జగన్‌మోహన్ రెడ్డి (YS Jagan) 2027లో మరోసారి పాదయాత్ర చేపట్టాలని నిర్ణయించారు. 2029 శాసనసభ ఎన్నికల్లో విజయం సాధించడమే లక్ష్యంగా ఈ పాదయాత్ర ఉంటుందని రాజకీయ విశ్లేషకులు భావిస్తున్నారు. 2017-19 మధ్య చేపట్టిన ప్రజా సంకల్ప యాత్ర (Praja Sankalpa Yatra) ద్వారా ప్రజల్లోకి వెళ్లి ప్రజాదరణ పొందారు జగన్. 2019 ఎన్నికల్లో అఖండ విజయం సాధించారు. ఇప్పుడు మళ్లీ అదే వ్యూహాన్ని అనుసరించాలని భావిస్తున్నారు. అయితే, ఈసారి రాజకీయ, చట్టపరమైన సవాళ్లు జగన్ ముందు అడ్డుగోడల్లా నిలుస్తున్నాయి.

2017లో చేపట్టిన ప్రజా సంకల్ప యాత్రలో జగన్ 3,648 కిలోమీటర్లు నడిచి, 341 రోజుల్లో 134 నియోజకవర్గాలను కవర్ చేశారు. ఈ యాత్ర ద్వారా ప్రజల సమస్యలను దగ్గరగా తెలుసుకుని, వాటిని పరిష్కరించే మేనిఫెస్టోను రూపొందించారు. ఈ యాత్ర వైసీపీకి 2019లో 151 శాసనసభ సీట్లతో అధికారాన్ని అందించింది. అయితే 2024 ఎన్నికల్లో వైసీపీ కేవలం 11 సీట్లకు పరిమితమై ప్రతిపక్ష హోదాను కూడా కోల్పోయింది. ఈ నేపథ్యంలో పార్టీ శ్రేణుల్లో ఉత్సాహం నింపడం, ప్రజల్లో తిరిగి విశ్వాసం పొందడం కోసం జగన్ మరో పాదయాత్రను ప్లాన్ చేస్తున్నారని రాజకీయ వర్గాలు అంచనా వేస్తున్నాయి.

2017-19లో జగన్ పాదయాత్రకు అప్పటి టీడీపీ ప్రభుత్వం (TDP Govt) ఎలాంటి ఆటంకాలు కలిగించకుండా సహకరించింది. అయితే, 2019-24 మధ్య జగన్ అధికారంలో ఉన్నప్పుడు, టీడీపీ యువనేత నారా లోకేశ్ (Nara Lokesh) చేపట్టిన ‘యువగళం’ (Yuvagalam) పాదయాత్రకు వైసీపీ ప్రభుత్వం అనేక ఆంక్షలు విధించింది. అనుమతులు రద్దు చేయడం, పోలీసు జోక్యం, రాజకీయ ఒత్తిళ్లు వంటివి లోకేశ్ యాత్రను తీవ్రంగా ప్రభావితం చేశాయి. ఈ నేపథ్యంలో ప్రస్తుత టీడీపీ ప్రభుత్వం జగన్ పాదయాత్రకు ఎంతమేర సహకరిస్తుందన్నది ప్రశ్నార్థకంగా మారింది. టీడీపీ నాయకుడు లోకేశ్ ఇప్పటికే జగన్ పాదయాత్రపై వ్యంగ్యాస్త్రాలు సంధించారు. ఈసారి జగన్ పాదయాత్ర అధికారం కోసం కాదు, ప్రజల క్షమాపణ కోసం అని ఎద్దేవా చేశారు.

జగన్‌పై పెండింగ్‌లో ఉన్న అక్రమాస్తుల కేసులు, ఇటీవల కొత్తగా లిక్కర్ కేసులో (Liquor Scam) ఆయన పేరు వినిపిస్తుండటం వైసీపీ శ్రేణుల్లో ఆందోళన కలిగిస్తోంది. 2012లో అక్రమాస్తుల కేసులో జగన్ 16 నెలల పాటు జైలు శిక్ష అనుభవించారు. ఇప్పుడు కాకినాడ సీపోర్ట్, సోలార్ పవర్ కాంట్రాక్టులు, లిక్కర్ స్కామ్ వంటి కేసుల్లో జగన్, ఆయన సన్నిహిత నాయకులపై ఆరోపణలు తీవ్రంగా ఉన్నాయి. ఈ కేసులు కొలిక్కి వస్తే, జగన్ మళ్లీ జైలుకు వెళ్లే అవకాశం ఉందని రాజకీయ వర్గాలు అంచనా వేస్తున్నాయి. ఇటువంటి పరిస్థితుల్లో పాదయాత్ర ప్రకటన ద్వారా పార్టీ క్యాడర్‌లో ధైర్యం నింపడం, ప్రజల దృష్టిని కేసుల నుంచి మళ్లించడం జగన్ లక్ష్యంగా కనిపిస్తోందని కొందరు భావిస్తున్నారు.

2024 ఎన్నికల్లో వైసీపీ ఘోర పరాజయం వెనుక అనేక కారణాలు ఉన్నాయి. ఉద్యోగ నియామకాలు లేకపోవడం, రాజధాని అమరావతి అంశంపై అసంతృప్తి, ల్యాండ్ టైట్లింగ్ యాక్ట్‌ పై వివాదం, అధికార పార్టీ నాయకుల అహంకార వైఖరి, విపక్ష నేతలపై కక్ష సాధింపులు వంటివి ప్రజలను వైసీపీకి దూరం చేశాయి. అయితే, జగన్ తన సంక్షేమ పథకాల ద్వారా గ్రామీణ ప్రాంతాల్లో ఇంకా కొంత మద్దతును నిలుపుకున్నారు. కూటమి ప్రభుత్వం హామీలను అమలు చేయడంలో విఫలమైతే, జగన్ దాన్ని రాజకీయంగా వినియోగించుకోవచ్చు. అంతేకాక, తనపై, తన పార్టీ నాయకులపై ఉన్న చట్టపరమైన ఆరోపణల నుంచి ప్రజల దృష్టిని మళ్లించేందుకు కూడా జగన్ ఈ పాదయాత్రను ఒక వ్యూహంగా ఎంచుకోవచ్చు.