Y.S.Sharmila: స్ట్రాటజీ మార్చిన షర్మిల.. మోడీ పై ఘాటు వ్యాఖ్యలు..

ఏపీ (Andhra Pradesh) రాజకీయాల్లో షర్మిల (Y. S. Sharmila) కొత్త దూకుడుతో ముందుకు సాగుతున్నారు. కాంగ్రెస్ (Congress) పార్టీలో చేరిన తర్వాత ఆమె చూపిస్తున్న స్పష్టత, పోరాట ధోరణి గమనార్హం. గత ఏడాది తెలంగాణా (Telangana)లో తన పార్టీని కాంగ్రెస్‌లో విలీనం చేసి, ఆ తర్వాత ఏపీకి కాంగ్రెస్ అధ్యక్షురాలిగా బాధ్యతలు తీసుకున్నారు. అప్పటి నుంచే ఆమె అన్న వైఎస్ జగన్ (Y. S. Jagan Mohan Reddy)‌ను టార్గెట్ చేస్తూ చేసిన విమర్శలు రాజకీయంగా చర్చకు దారితీశాయి.

జగన్ ముఖ్యమంత్రి (Chief Minister) పదవిలో ఉన్న సమయంలో షర్మిల విమర్శలు ఎక్కువ చర్చకు వచ్చాయి. అయితే ఇది ఆమెకు గానీ, కాంగ్రెస్ పార్టీకి గానీ ఆశించిన ఫలితాలను ఇవ్వలేదు. దీనివల్ల టీడీపీ (TDP) కూటమికి మరింత బలం చేకూరింది. ముఖ్యంగా వైసీపీ (YSRCP ) బలంగా ఉన్న రాయలసీమ (Rayalaseema) ప్రాంతంలో కూడా ఓట్ల చీలిక చోటు చేసుకోవడంలో షర్మిల పాత్ర ఉందన్న విశ్లేషణలు వెలువడ్డాయి. తక్కువ తేడాతో వైసీపీ ఓడిపోయిన స్థానాల్లో ఆమె కారణం అనే అభిప్రాయం రాజకీయ వర్గాల్లో ప్రచారమైంది.

ఎన్నికలు ముగిసిన తర్వాత టీడీపీ ప్రభుత్వం ఏర్పడినా, షర్మిల మాత్రం జగన్‌ను టార్గెట్ చేయడాన్ని ఆపలేదు. కానీ అధికార టీడీపీని పెద్దగా విమర్శించకపోవడం వల్ల ఆమెపై కొంత విమర్శలు వచ్చాయి. కొన్ని సందర్భాల్లో ఆమె వ్యాఖ్యలు టీడీపీకి అనుకూలంగా ఉన్నాయి అన్న అభిప్రాయం కాంగ్రెస్ వర్గాల్లో కూడా ఏర్పడింది. ఈ పరిస్థితుల్లో షర్మిల తన దారిని మార్చారు. ఏపీకి సంబంధించిన అంశాల్లో కాంగ్రెస్ ఫిలాసఫీకి అనుగుణంగా మాట్లాడటం మొదలుపెట్టారు.

ఇప్పుడు ఆమె విమర్శలు మోడీ (Narendra Modi) ప్రభుత్వంపైనే ఎక్కువగా ఉన్నాయి. వక్ఫ్ చట్ట సవరణపై ఆమె చేసిన విమర్శలు, కాశ్మీర్ (Kashmir) ఉగ్రదాడిపై కేంద్రాన్ని నిందించడంలో ఆమె ధైర్యంగా వ్యవహరించడాన్ని అందరూ గమనిస్తున్నారు. మోడీ ఏపీకి ఏం చేశారు అనే ప్రశ్నను ఆమె బలంగా ఉంచడం, అమరావతి (Amaravati) గురించి ప్రశ్నించడంలో చూపిన ధైర్యం ఆమె ప్రజల్లోకి వెళ్లేలా చేసింది. “2015లో మోడీ మట్టి కొట్టారు, ఇప్పుడైతే సున్నం కొట్టారు” అనే వ్యాఖ్య సోషల్ మీడియాలో బాగా ట్రెండ్ అయింది. వైసీపీ మాత్రం కేంద్రంపై విమర్శలు చేయడంలో వెనుకడుగు వేస్తుండగా, షర్మిల మాత్రం స్పష్టమైన వ్యతిరేక ధోరణితో ముందుకెళ్తున్నారు. ఇది కాంగ్రెస్‌కు ఏపీలో మళ్లీ బలాన్ని చేకూర్చే అవకాశం కల్పించవచ్చని భావిస్తున్నారు. షర్మిల ఈ తరహాలో ప్రజా సమస్యలపై నిలదీస్తూ పాలిటిక్స్ చేస్తే, ఏపీలో కాంగ్రెస్‌కు మళ్లీ అవకాశాలు వస్తాయన్న అంచనాలు వినిపిస్తున్నాయి.