Thopudurthi: జగన్ హెలికాప్టర్ ఘటనపై కేసులు: చిక్కులో వైసీపీ నేతలు..

కూటమి ప్రభుత్వం అధికారంలోకి వచ్చిన తర్వాత వైసీపీ (YSRCP) నేతలపై కేసులు నమోదు చేసి అరెస్టుల పరంపర కొనసాగుతోంది. ఇప్పటికే అనేక మంది వైసీపీ నాయకులు వివిధ కేసుల్లో పోలీసుల చేతికి చిక్కగా, తాజాగా రాప్తాడు (Raptadu) నియోజకవర్గానికి చెందిన మాజీ ఎమ్మెల్యే తోపుదుర్తి ప్రకాష్ రెడ్డి (Thopudurthi Prakash Reddy) పేరూ ఈ జాబితాలో చేరింది. ఆయన అనుచరుల్లో 10 మందిని ఇప్పటికే అరెస్టు చేసిన పోలీసులు, ఇప్పుడు మాజీ ఎమ్మెల్యే కోసం గాలింపు చర్యలు ముమ్మరం చేశారు.

ఇటీవల సత్యసాయి జిల్లా (Sri Sathya Sai District) రామగిరి మండలంలోని కుంటిమడ్డి (Kuntimaddi) గ్రామాన్ని వైఎస్ జగన్ (Jagan) పర్యటించిన సమయంలో ఒక వివాదాస్పద ఘటన చోటుచేసుకుంది. జగన్ ప్రయాణిస్తున్న హెలికాప్టర్ వద్ద వైసీపీ కార్యకర్తలు గుంపుగా చేరడంతో హెలికాప్టర్‌కు ప్రమాదం ఏర్పడిందని పోలీసులు వెల్లడించారు. ఈ ఘటనలో విండ్ షీల్డ్ దెబ్బతినడంతో భద్రతా లోపాలపై విమర్శలు వెల్లువెత్తాయి. కానీ, ఇప్పుడు అదే ఘటనను ఆధారంగా తీసుకుని పోలీసుల దృష్టి వైసీపీ నేతలపైకి మళ్లింది.

పోలీసుల విచారణలో ఈ ఘటనకు తోపుదుర్తి ప్రకాష్ రెడ్డి ప్రధాన సూత్రధారి అని భావిస్తున్నారు. ఆయనపై ఏ1 నిందితుడిగా కేసు నమోదు చేశారు. దీంతో ఆయనను అరెస్టు చేయడానికి మూడు ప్రత్యేక దర్యాప్తు బృందాలు రంగంలోకి దిగాయి. హైదరాబాద్ (Hyderabad), బెంగళూరు (Bengaluru), చెన్నై (Chennai), విజయవాడ (Vijayawada) నగరాల్లో ఆయన ఆచూకీ కోసం గాలిస్తున్నారు. దీనితో ఆయన ప్రస్తుతం ఎక్కడ ఉన్నారనే విషయంలో స్పష్టత లేకపోవడంతో పోలీసుల దృష్టి మొత్తం అదే అంశంపై కేంద్రీకరించింది.

ఇప్పటికే అదుపులోకి తీసుకున్న పది మంది అనుచరులను కోర్టులో హాజరుపరచగా, వారికి బెయిల్ మంజూరైంది. ఇదే సమయంలో తోపుదుర్తి అరెస్టు కాకుండా ఉండేందుకు ఆయన ముందస్తు బెయిల్ కోసం కోర్టును ఆశ్రయించారని సమాచారం. మరోవైపు పోలీసుల పని తీరుపై డీజీపీ (DGP) కార్యాలయం అసంతృప్తి వ్యక్తం చేసినట్లు తెలుస్తోంది. ఈ పరిణామాల నేపథ్యంలో ఆదివారం కొంతమంది వైసీపీ నేతలను అత్యవసరంగా అరెస్టు చేశారు. ఈ సమాచారం తెలిసిన తర్వాత మాజీ ఎంపీ గోరంట్ల మాధవ్ (Gorantla Madhav) రామగిరి (Ramagiri) పోలీస్ స్టేషన్‌కి వచ్చి కొద్దిసేపటిలోనే వెనుదిరిగారు. అదే సమయంలో జిల్లా అధ్యక్షురాలు ఉషశ్రీ (Ushasri) సుమారు అరగంట పాటు పోలీస్ స్టేషనులో ఉన్నారు. ఇలా వరసగా వైసీపీ నేతల అరెస్టులు, పోలీసుల దర్యాప్తు చర్యలు ఆంధ్రప్రదేశ్ రాజకీయాలలో హీట్ పెంచుతున్నాయి.