Pakistan Vs TTP: టీటీపీ పడగ నీడలో పాక్.. వదల బొమ్మాళి అంటున్న ఉగ్రవాద సంస్థ..

తెహ్రీకే తాలిబాన్‌ పాకిస్తాన్‌ (TTP) అనేది పాకిస్తాన్‌ పెంచిన పెరటి మొక్క. ఇది అనేక తాలిబాన్‌ వర్గాల కలయికతో ఏర్పడిన ఉగ్రవాద సంస్థ. 2007లో బజావుర్, స్వాట్, ఖైబర్‌ ప్రాంతాల నుంచి పుట్టుకొచ్చిన ఈ వర్గాలు ఒక్కటై పాకిస్తాన్‌లోని మిలిటరీ, రాజకీయ వ్యవస్థలపై దాడులు ప్రారంభించాయి.దీని వెనుక అల్‌ఖైదా ప్రత్యక్ష మద్దతు ఉండటమే కాకుండా, ఒసామా బిన్‌ లాడెన్‌ చుట్టూ ఉన్న నెట్‌వర్క్‌ ఆరంభంలో దీనిని ప్రభావితం చేసింది.

ఆఫ్గాన్‌ తాలిబాన్, తెహ్రీకే తాలిబాన్‌ పాక్‌ మధ్య భావజాల సమానత ఉన్నా, లక్ష్యాలు వేరు. ఆఫ్గాన్‌ తాలిబాన్‌ ప్రధానంగా తమ దేశంతోపాటు పాకిస్తాన్‌లో ఇస్లామిక్‌ పాలనను స్థాపించడమే లక్ష్యంగా పెట్టుకుంది. టీటీపీ పాకిస్తాన్‌లో సైనిక వ్యవస్థను కూల్చి దాని స్థానంలో ఇస్లామిక్‌ శరియా పాలనను తీసుకురావాలని భావిస్తోంది. ఇద్దరి మధ్య మతాధార సాన్నిహిత్యం ఉన్నప్పటికీ, పాకిస్తాన్‌–ఆఫ్గాన్‌ సంబంధాలు దిగజారడంతో సంబంధాలు తాజాగా మరింత క్లిష్టంగా మారాయి.

సరిహద్దు మంటల వెనక…?

డ్యూరాండ్‌ లైన్‌ 1893లో బ్రిటన్‌ గీసిన సరిహద్దు. ఇది పస్టూన్‌ తెగలను రెండుభాగాలుగా చీల్చింది. ఆఫ్గానిస్తాన్‌లో సగానికి పైగా ప్రజలు పస్టూన్లు కావడంతో, ఆ దేశం ఆ రేఖను ఎప్పుడూ చట్టబద్ధమని ఒప్పుకోలేదు.పస్టూన్‌ నేషనలిజం ఇప్పటికీ ఉభయ దేశాల మధ్య ద్వేషాన్ని రెచ్చగొడుతోంది. ఈ వివాదమే ప్రస్తుతం జరిగిన ఆఫ్గాన్‌–పాక్‌ ఘర్షణలకు ప్రధాన కారకం.

అమెరికా–పాకిస్తాన్‌–ఉగ్రవాదం..

2001 తర్వాత అమెరికా ఉగ్రవాదంపై యుద్ధం ప్రకటించినప్పుడు పాకిస్తాన్‌ ‘‘మిత్రదేశం’’గా వ్యవహరించినప్పటికీ, ఒసామా బిన్‌ లాడెన్‌కు ఆశ్రయం ఇచ్చింది. అమెరికా దీనిపై దాడులు చేయడంతో ప్రతీకారం తీర్చుకునే ఉద్దేశ్యంతో.. నాటి తాలిబన్ ఉగ్రవాద వర్గాలకు మద్దతిచ్చింది. ఇప్పుడు అదే అల్‌ఖైదాకు టార్గెట్‌గా మారింది పాక్. ఇప్పుడు అదే శక్తి పాకిస్తాన్‌ ను దహిస్తోంది.

భారత్‌–ఆఫ్గాన్‌ స్నేహం..

భారత్‌కు ఆఫ్గానిస్తాన్‌ చిరకాల మిత్రదేశం. తాలిబన్ల ముందు, తాలిబన్ల హయాంలో కూడా ఆఫ్గాన్‌ .. ఢిల్లీతో స్నేహబంధాలన్ని కొనసాగించింది. లేటెస్టుగా ఆఫ్గాన్‌ విదేశాంగ మంత్రి ముత్తఖీ భారత్‌ పర్యటన చేయడం ఇస్లామాబాద్‌ను రగిలించింది. దీని వెనుక ‘శత్రువు పట్ల శత్రుడు మిత్రుడు‘ అనే చాణక్య సూత్రం స్పష్టంగా కనిపిస్తోంది.