Jagan: నిన్న టీడీపీ నేడు బీజేపీ..జగన్ కంచుకోట పై కూటమి కన్ను..

తెలుగుదేశం పార్టీ ఇటీవల కడప (Kadapa) జిల్లాలో మహానాడు (Mahanadu) కార్యక్రమాన్ని చాలా ఘనంగా నిర్వహించింది. ఇది అక్కడి రాజకీయ వాతావరణాన్ని పూర్తిగా మార్చేసింది. తెలుగుదేశం పార్టీ ఏర్పడిన తరువాత ఎన్నో నగరాల్లో మహానాడు జరిగింది. కానీ ఇప్పటివరకు కడప జిల్లాలో ఎప్పుడూ ఈ స్థాయిలో పార్టీ కార్యకలాపాలు జరగలేదు. ఆ లోటును ఈసారి అధిగమించి, రాయలసీమలో ముఖ్యంగా వైఎస్ కడప జిల్లాలో తాము బలంగా ఉన్నామని తెలుగుదేశం (TDP) ఘనంగా చూపించింది. గతంలో విభజన తర్వాత రాష్ట్రంలో టీడీపీ ఎన్నడూ గెలవని సీట్లను సాధించి చూపిన నేపథ్యంలో కడప వంటి వైసీపీ గడపను టార్గెట్ చేయడం వెనుక బలమైన వ్యూహమే ఉందని చెప్పాలి.

ఇప్పుడు అదే మార్గంలో కూటమిలోని మరో పార్టిగా ఉన్న భారతీయ జనతా పార్టీ (BJP) కూడా కడప నుంచే తన ఉద్యమాన్ని ప్రారంభించేందుకు సిద్ధమవుతోంది. కొత్త రాష్ట్ర అధ్యక్షుడిగా బాధ్యతలు చేపట్టిన పీవీఎన్ మాధవ్ (PVN Madhav) రాష్ట్ర పర్యటనలకు రంగం సిద్ధం చేస్తున్నారు. ఆయన ‘సారధ్యం’ (Saradhyam) పేరుతో చేపట్టనున్న పర్యటనను కడప నుంచే ప్రారంభించనున్నట్లు ప్రకటించారు. అయితే ఇది పూర్తిగా రాజకీయ కోణంలో కాదని, ఆధ్యాత్మిక దృష్టితో తీసుకున్న నిర్ణయం అని ఆయన చెప్పారు. దేవుని తొలిగడపగా ప్రసిద్ధిగాంచిన కడప నుంచి తమ పార్టీ సారథ్యం కార్యక్రమాన్ని మొదలు పెడతామన్న మాధవ్ వ్యాఖ్యలు ఆసక్తికరంగా మారాయి.

ఈ కార్యక్రమం మొత్తం ఐదు విడతలుగా రాష్ట్రవ్యాప్తంగా సాగనుంది. మాధవ్ స్వస్థలమైన ఉత్తరాంధ్ర నుంచి కాకుండా, రాయలసీమకు చెందిన ముఖ్యమైన జిల్లాలో తన తొలి పర్యటన మొదలుపెట్టడం రాజకీయ వర్గాల్లో చర్చనీయాంశంగా మారింది. ఎందుకంటే ఇదే జిల్లా ముఖ్యమంత్రి జగన్ మోహన్ రెడ్డి (Jagan Mohan Reddy)కి రాజకీయంగా బలమైన కంచుకోటగా ఉంది. ఇటీవలి ఎన్నికల్లో రాయలసీమలో వైసీపీ (YSRCP) తన ఆధిపత్యాన్ని కోల్పోయిన నేపథ్యంలో టీడీపీ, బీజేపీ, జనసేన (JanaSena) అన్ని పార్టీలూ అక్కడ తమ పట్టు కోసం పోటీ పడుతున్నాయి.

పవన్ కళ్యాణ్ (Pawan Kalyan) ఇప్పటికే సీమలో పర్యటనలు చేస్తున్నారు. చంద్రబాబు నాయుడు (Chandrababu Naidu) సైతం తరచూ సీమ జిల్లాల్లో కనిపిస్తున్నారు. ఇప్పుడు బీజేపీ కూడా అక్కడే దృష్టి పెట్టడం వల్ల రాయలసీమ రాజకీయాలు మరో మలుపు తిరిగాయి. ఈ పరిణామాల నేపథ్యంలో తమ బలాన్ని తిరిగి నిరూపించుకోవాలంటే వైసీపీ మరింత కృషి చేయాల్సిన పరిస్థితి ఏర్పడింది. ఇక నుంచి రాయలసీమ వైపు దృష్టి పెట్టే పార్టీల మధ్య కచ్చితంగా గట్టి పోటీ తప్పదన్నది స్పష్టంగా కనిపిస్తోంది.