Bihar Elections: ఏపీ రాజకీయ దిశను నిర్ణయించే కీలక పరీక్షగా బీహార్ ఎన్నికలు..

బీహార్ (Bihar) రాజకీయ వాతావరణం ప్రస్తుతం ఉద్రిక్తంగా మారింది. ఎన్డీఏ (NDA) ,మహాఘాట్ బంధన్ (Maha Ghat Bandhan) మధ్య గట్టి పోరు నడుస్తోంది. ఈ ఎన్నికల్లో ఎవరు గెలుస్తారన్నది దేశవ్యాప్తంగా ఆసక్తిని రేకెత్తిస్తోంది. ముఖ్యంగా ఆంధ్రప్రదేశ్ (Andhra Pradesh) రాజకీయాల్లో కూడా ఈ ఫలితాలు ప్రభావం చూపే అవకాశం ఉంది. తాజాగా ఏపీ ముఖ్యమంత్రి నారా చంద్రబాబు నాయుడు (Nara Chandrababu Naidu) బీహార్ ప్రచారంలో పాల్గొననున్నారని ప్రకటించారు. ఎన్డీఏలో కీలక భాగస్వామిగా ఉన్న ఆయనకు బీజేపీ (BJP) నాయకత్వం ప్రత్యేక ఆహ్వానం అందించింది. గతంలో ఢిల్లీలో (Delhi) ఆయన చేసిన ప్రచారం విజయవంతం కావడంతో, ఇప్పుడు బీహార్ లోనూ ఆయన ప్రభావం చూపుతారని కేంద్ర నేతలు భావిస్తున్నారు.

మరోవైపు బీహార్ సీఎం నితీష్ కుమార్ (Nitish Kumar) కు చంద్రబాబు మధ్య ఉన్న మంచి అనుబంధం ఈ ప్రచారానికి మరింత బలం చేకూరుస్తుంది. అయితే అక్కడ రాజకీయ పోటీ అత్యంత సమానంగా ఉంది. మహాఘాట్ బంధన్ తరఫున ఆర్జెడి (RJD) ,కాంగ్రెస్ పార్టీ (Congress Party) బలంగా ప్రచారం చేస్తున్నాయి. ఆర్జెడి యువనేత తేజస్వి యాదవ్ (Tejashwi Yadav) యువతను ఆకర్షించేందుకు కృషి చేస్తున్నారు. కాంగ్రెస్ నాయకుడు రాహుల్ గాంధీ (Rahul Gandhi) కూడా బీహార్ పై దృష్టి పెట్టి వరుసగా సభలు నిర్వహిస్తున్నారు. ఈ క్రమంలో ప్రజల్లో కొంతమంది మార్పు కోరుకుంటున్నారని విశ్లేషకులు చెబుతున్నారు.

ఎన్డీఏ పక్షాన నితీష్ కుమార్ దీర్ఘకాలంగా అధికారంలో ఉండటంతో కొంత వ్యతిరేకత ఉండొచ్చని భావిస్తున్నారు. అయితే ఆయన పరిపాలనా అనుభవం కూడా ఎన్డీఏకు బలంగా మారవచ్చు. ఫలితంగా రెండు కూటములూ సమానంగా తలపడుతున్నాయి. ఒకవేళ మహాఘాట్ బంధన్ గెలిస్తే కాంగ్రెస్ పార్టీకి పునరుద్ధరణ అవకాశాలు పెరుగుతాయి. దేశవ్యాప్తంగా కాంగ్రెస్ మరింత బలపడే అవకాశం ఉంది. అదే జరిగితే ఆ ప్రభావం ఆంధ్రప్రదేశ్ రాజకీయాలపై కూడా పడవచ్చు. ముఖ్యంగా వైయస్సార్ కాంగ్రెస్ పార్టీ (YSR Congress Party)కి ఇది సవాలుగా మారవచ్చు. ఇప్పటికే ఆ పార్టీ నుంచి కొంతమంది నేతలు వెళ్లిపోయారు. వారు తిరిగి కాంగ్రెస్ వైపు మొగ్గుచూపే అవకాశం ఉంది. ఇది టీడీపీ (TDP) కూటమికి అనుకూలంగా మారవచ్చు.

అయితే ఎన్డీఏ ఓడిపోతే పరిస్థితి భిన్నంగా ఉంటుంది. అప్పుడు చంద్రబాబు వైఖరిలో కొంత మార్పు రావచ్చు. 2026లో జరగబోయే రాష్ట్ర ఎన్నికల దృష్ట్యా ఆయన తన వ్యూహాన్ని తిరిగి ఆలోచించే అవకాశం ఉంది. అప్పుడు బీజేపీ కి అనుకూలంగా వైయస్సార్ కాంగ్రెస్ పార్టీ కదిలే అవకాశం కూడా ఉంది, ఎందుకంటే ఆ పార్టీ కాంగ్రెస్‌తో దూరం పాటిస్తోంది. మొత్తం మీద బీహార్ ఎన్నికలు దేశ రాజకీయ దిశను నిర్ణయించే కీలక ఘట్టంగా మారాయి. ఆ ఫలితాలు ఏపీ రాజకీయ సమీకరణాలపై కూడా స్పష్టమైన ప్రభావం చూపే అవకాశం ఉంది. దీంతో ఇప్పుడు అందరి దృష్టి బీహార్ ఓటర్ల తీర్పుపై నిలిచింది.