అలెక్సాతో చిన్నారిని కాపాడిన బాలిక.. జాబ్ ఆఫర్ చేసిన ఆనంద్ మహీంద్రా

ఉత్తరప్రదేశ్‌లోని బస్తీ జిల్లాకు చెందిన నిఖిత(13) అలెక్సా సహాయంతో ఓ కోతి దాడి నుంచి తన అక్క కూతురిని రక్షించింది. కుటుంబ సభ్యులందరూ వేరే గదిలో ఉన్న సమయంలో ఆమె ఏడాది వయసు గల చిన్నారితో ఆడుకుంటుండగా ఓ కోతి ఆ ఇంట్లోకి దూరింది. పాపపై దాడిచేసేందుకు ప్రయత్నించగా, నిఖిత సమయస్ఫూర్తితో వ్యవహరించి ఫ్రిడ్జ్‌ పైన ఉన్న అలెక్సాకు కుక్కలా మొరుగు అంటూ ఆదేశాలిచ్చింది. అనంతరం అలెక్సా కుక్కలా మొరగడంతో ఆ అరుపులకు కోతి భయపడి పారిపోయింది. ఇలా కోతి బారి నుంచి తనతోపాటు తన అక్క కూతురిని కూడా ఆమె రక్షించుకుంది. ఈ విషయం తెలుసుకున్న మహీంద్రా గ్రూప్‌ చైర్మన్‌ ఆనంద్‌ మహీంద్రా నిఖిత సమయస్ఫూర్తిని మెచ్చి ఆమెకు జాబ్‌ ఆఫర్‌ చేశారు. చదువు పూర్తయ్యాక నిఖిత కార్పొరేట్‌ ఉద్యోగం చేయాలనుకుంటే తాను ఇస్తానన్నారు.