తన సొంత వివాదాన్నే సినిమాగా నరేష్, ఆయన ప్రేయసి పవిత్రా లోకేశ్ ల ‘మళ్ళీ పెళ్లి’!
సీనియర్ నటుడు నరేష్, ఆయన ప్రేయసి పవిత్రా లోకేశ్ జంటగా నటించిన చిత్రం ‘మళ్ళీ పెళ్లి’. సీనియర్ నిర్మాత ఎం.ఎస్.రాజు ఈ సినిమాకు దర్శకత్వం వహించారు. నరేష్ స్వయంగా ఈ సినిమాను నిర్మిస్తున్నారు. ఇప్పటికే విడుదలైన పోస్టర్లకు ప్రేక్షకుల నుంచి మంచి స్పందన వచ్చింది. అసలు నరేష్ మామూలు షాక్ ఇవ్వలేదంటూ అప్పట్లో సోషల్ మీడియాలో ఈ విషయం బాగా వైరల్ అయ్యింది. ఇప్పుడు ఈ సినిమా టీజర్‌తో నరేష్ మరో షాక్ ఇచ్చారు. సీనియర్ నటుడు వీకే నరేష్ , కన్నడ నటి పవిత్రా లోకేశ్ ప్రేమాయణం ఎంత వివాదాస్పదమైందో అందరికీ తెలిసిందే. నరేష్ మూడో భార్య రమ్య రఘుపతి తన భర్త ప్రేమాయణం గురించి బహిరంగంగా ఆరోపణలు చేశారు. తనకు విడాకులు ఇవ్వకుండానే నరేష్ మరో పెళ్లికి సిద్ధపడ్డాడు అంటూ మీడియా ముందుకు వచ్చారు.
అంతేకాదు, నరేష్-పవిత్ర బెంగళూరులో ఓ హోటల్‌లో ఉండగా అక్కడికి వెళ్లి రమ్య రఘుపతి రచ్చ చేశారు. దీంతో పోలీసులు రంగంలోకి దిగాల్సి వచ్చింది. ఈ వివాదం జరుగుతున్న క్రమంలో నరేష్ ఒక ఫొటోను సోషల్ మీడియాలో వదిలారు. ఆ ఫొటోలో పవిత్రా లోకేశ్‌కు నరేష్ లిప్ లాక్ ఇచ్చినట్టు ఉంది. ఇంకేముంది తమ బంధాన్ని అధికారికంగా ప్రకటించేశారు అని అంతా అనుకున్నారు. ఆ తరవాత కొన్ని రోజులకు తమకు పెళ్లి జరిగిపోయిందంటూ ఒక వీడియోను విడుదల చేశారు.
ఈ వీడియో చూసిన కొందరు అనుమానం వ్యక్తం చేశారు. ఇది నిజం పెళ్లిలా లేదే అన్నారు. దీనిపై చర్చ జరుగుతున్న సమయంలో ‘మళ్ళీ పెళ్లి’ అంటూ పోస్టర్ వదిలారు. వామ్మో.. నరేష్ మావ ఎంత షాక్ ఇచ్చావ్ అని చాలా మంది సినీ ప్రేమికులు సోషల్ మీడియాలో కామెంట్లు చేయడం మొదలుపెట్టారు. ఇక ఈరోజు ‘మళ్ళీ పెళ్లి’ టీజర్‌ను ప్రేక్షకుల ముందుకు తీసుకొచ్చారు నరేష్. ఈ టీజర్ చూసిన తరవాత ప్రేక్షకులకు ఇంకా పెద్ద షాక్ తగిలింది. అదేంటంటే.. తన సొంత వివాదాన్నే సినిమాగా చూపించబోతున్నారు నరేష్. రమ్య రఘుపతితో గొడవలు.. ఆమె మీడియా ముందుకు వచ్చిన చేసిన ఆరోపణలు..
హోటల్‌లో నరేష్, పవిత్రా లోకేశ్ దొరికిపోవడం వంటి సన్నివేశాలతో టీజర్ కట్ చేశారు. బహుశా రమ్య రఘుపతిని టార్గెట్ చేస్తూ ఈ సినిమా కథ ఉండబోతోందేమో. ఈ టీజర్ చూసిన చాలా మంది ‘నరాలు తెగిపోయాయి.. ఇదేం ట్విస్ట్ బాబోయ్’ అంటూ యూట్యూబ్‌లో కామెంట్లు పెడుతున్నారు. తాను సినీ పరిశ్రమలోకి అడుగుపెట్టి 50 ఏళ్లు పూర్తిచేసుకున్న సందర్భంగా ఈ సినిమాను రూపొందిస్తున్నారు నరేష్. ఆయన తల్లి స్థాపించిన విజయకృష్ణ మూవీస్ బ్యానర్‌పై తానే నిర్మాతగా ఈ సినిమాను నరేష్ నిర్మిస్తున్నారు. రమ్య రఘుపతి పాత్రలో వనిత విజయకుమార్ నటించారు.
ఆ పాత్రకు ఆమె సరిగ్గా సరిపోయారని టీజర్ చూస్తే అర్థమవుతోంది. ఈ సినిమాకు ప్రముఖ నిర్మాత, దర్శకుడు ఎం.ఎస్.రాజు దర్శకత్వం వహించారు. సురేష్ బొమ్మిలి సంగీతం సమకూర్చారు. తమపై అల్లుకున్న వివాదం, తమ బంధం గురించి ఈ సినిమా ద్వారా నరేష్, పవిత్ర గట్టిగా చెప్పబోతున్నట్టున్నారు.
