ఐపీఎల్ వేదికపై తెలుగు పాటల సందడి! ప్రారంభ వేడుకలో పెర్ఫార్మెన్స్‌లతో అదరగొట్టిన రష్మిక, తమన్నా
ఐపీఎల్ 2023 ప్రారంభ వేడుకలో స్టార్ హీరోయిన్లు తమన్నా భాటియా, రష్మిక మందన తమ పెర్ఫార్మెన్సులతో అదరగొట్టారు. తెలుగు పాటలకు ఈ ముద్దుగుమ్మలు స్టెప్పులేయడం విశేషం. ఐపీఎల్ 2023 పండగ మళ్లీ మొదలైంది! ఇండియన్ ప్రీమియర్ లీగ్ 2023 ప్రారంభోత్సవ వేడుక ఇండియన్ బిగ్గెస్ట్ నరేంద్ర మోదీ స్టేడియంలో ఈరోజు అంగరంగ వైభవంగా జరిగింది. ప్రతి ఏడాది మాదిరిగానే ఈ సంవత్సరం కూడా సినీ సెలబ్రిటీల పెర్ఫార్మెన్స్‌లతో ఐపీఎల్ వేడుక ప్రారంభమైంది. ప్రముఖ గాయకుడు, మ్యూజిక్ కంపోజర్ అరిజీత్ సింగ్ లైవ్ పెర్ఫార్మెన్స్‌తో పాటు తమన్నా భాటియా, రష్మిక మందన డాన్స్ షో ప్రేక్షకులను ఆకట్టుకున్నాయి. ముఖ్యంగా తమన్నా, రష్మిక పెర్ఫార్మెన్స్‌లకు సంబంధించిన ఫొటోలు, వీడియోలు ప్రస్తుతం సోషల్ మీడియాలో వైరల్‌గా మారాయి.
తమిళ పాటతో తమన్నా భాటియా డాన్స్ షో మొదలవగా.. రష్మిక మందన మాత్రం తన సినిమా ‘పుష్ప’లోని సామీ సామీ పాటతో పెర్ఫార్మెన్స్ షురూ చేసింది. సామీ సామీ అంటూ తన మార్క్ స్టెప్పులతో అదరగొట్టింది. ప్రస్తుతం ఈ విజువల్స్ ఇంటర్నెట్‌‌లో చక్కర్లు కొడుతున్నాయి. అలాగే, ‘నాటు నాటు’ పాటకు కూడా రష్మిక మందన డాన్స్ చేసింది. ఐపీఎల్ ప్రారంభోత్సవ వేడుకలో ఒకప్పుడు ఎక్కువగా హిందీ పాటలకే ప్రాధాన్యత ఇచ్చేవారు. అలాంటి ఇప్పుడు తెలుగు, తమిళ పాటలకు అధిక ప్రాధాన్యత ఇవ్వడం గమనార్హం. ఇదిలా ఉంటే, ఈరోజు తొలి ఐపీఎల్ మ్యాచ్ డిఫెండింగ్ ఛాంపియన్స్ గుజరాత్ టైటాన్స్, నాలుగు సార్లు ఛాంపియన్ చెన్నై సూపర్ కింగ్స్ మధ్య జరుగుతోంది. టాస్ గెలిచిన గుజరాత్ టైటాన్స్ కెప్టెన్ హార్దిక్ పాండ్య బౌలింగ్ ఎంచుకున్నాడు. కాగా, ఐపీఎల్ ప్రారంభ వేడుకలో పెర్ఫార్మెన్స్ ఇవ్వడంపై రష్మిక మందన, తమన్నా భాటియా అంతకుముందు తమ ఆనందాన్ని వ్యక్తపరిచారు.
స్టార్ స్పోర్ట్స్ ఛానెల్‌తో తమన్నా మాట్లాడుతూ.. ‘ప్రత్యేక వేదికలపై ప్రదర్శనలు ఇవ్వడాన్ని నేను నా కెరీర్ ప్రారంభించినప్పటి నుంచీ ఆస్వాదిస్తున్నాను. అయితే, నేను వేదికలపై ప్రదర్శన ఇచ్చిన ప్రతి సారీ నాకు ఎంతో సంతోషంగా ఉంటుంది. ఒక కొత్త ఎనర్జీ వస్తుంది’ అని చెప్పింది. ఈరోజు ప్రదర్శన ఇవ్వడానికి ఎంతో ఆసక్తిగా ఎదురుచూస్తున్నానని వెల్లడించింది. ఇక రష్మిక మందన మాట్లాడుతూ.. ‘నాకు ప్రతిసారీ క్రికెట్ మ్యాచ్ చూడటానికి వెళ్లాలని, అక్కడ ప్రదర్శన ఇవ్వాలని ఉంటుంది. కానీ, ఇప్పటి వరకు నాకు అలాంటి అవకాశం రాలేదు. ఈరోజు ఐపీఎల్ ప్రారంభోత్సవ వేడుకలో నేను ప్రదర్శన ఇవ్వబోతున్నాను. నేను సాధించాను అని ఇప్పుడు నాకు అనిపిస్తోంది’ అని తెలిపింది.
