పవన్ కళ్యాణ్ 'OG' 30 రోజుల్లో చుట్టేస్తారా? అభిమానులను కలవరపెడుతున్న షూటింగ్ షెడ్యూల్ డేట్స్
చిన్న బడ్జెట్ సినిమా కొబ్బరి కాయ కొట్టిన నుండి గుమ్మడి కాయ కొట్టేవరకు కనీసం 50 రోజులైనా పడుతుంది. అదే టాప్ స్టార్స్ తో చేసే బిగ్ బడ్జెట్ మూవీస్ అయితే కనీసం ఆరు నెలలైనా షూటింగ్ ఉంటుంది. కానీ డైరెక్టర్ సుజీత్ స్టేట్మెంట్ తో పవర్ స్టార్ పవన్ కళ్యాణ్ కొత్త సినిమాకు సంబంధించిన అప్‌డేట్స్ అభిమానులను కాస్త గందరగోళానికి గురిచేస్తున్నాయి. ‘సాహో’ డైరెక్టర్ సుజీత్‌తోకలిసి OG అనే సినిమాను పవన్ కళ్యాణ్ చేస్తున్న సంగతి తెలిసిందే. ఈ సినిమా నేడు పూజాకార్యక్రమాలతో ప్రారంభమైంది. పవర్ స్టార్ పవన్ కళ్యాణ్ సినిమా వస్తుందంటే ఫ్యాన్స్‌కు పూనకాలు వచ్చేస్తుంటాయి. కొత్త సినిమా ప్రకటన వచ్చిన దగ్గర నుంచి అది విడుదలయ్యేంత వరకు పవర్ స్టార్ ఫ్యాన్స్ ఆ సినిమా ప్రపంచం లోనే జీవించేస్తుంటారు. ఎప్పుడెప్పుడు పవన్ కళ్యాణ్ కొత్త సినిమాను తెరపై చూసేద్దామా అని ఆరాటపడుతుంటారు. ఇప్పుడు అలాంటి ఆరాటమే మళ్లీ పవన్ కళ్యాణ్ అభిమానుల్లో ఈ రోజు మొదలయింది.
దీనికి కారణం పవర్ స్టార్ కొత్త సినిమా ప్రారంభమవడమే. ‘సాహో’ లాంటి హై-ఆక్టేన్ యాక్షన్ ఎంటర్‌టైనర్‌ను తెరకెక్కించిన యంగ్ డైరెక్టర్ సుజీత్‌తో పవన్ కళ్యాణ్ సినిమా చేస్తున్న సంగతి తెలిసిందే. RRR లాంటి బ్లాక్ బస్టర్ మూవీని అందించిన డీవీవీ ఎంటర్‌టైన్మెంట్ బ్యానర్‌పై డీవీవీ దానయ్య ఈ సినిమాను నిర్మిస్తున్నారు. 'OG' అనే ఆసక్తికర టైటిల్‌తో రూపొందనున్న ఈ సినిమాను ఈ రోజు సోమవారం పూజా కార్యక్రమాలతో ఘనంగా ప్రారంభించారు. ఈ ప్రారంభోత్సవానికి సంబంధించిన ఫొటోలు, వీడియోలు ప్రస్తుతం సోషల్ మీడియాలో వైరల్‌గా మారాయి. అయితే, పవన్ కళ్యాణ్‌తో సుజీత్ చేయబోయే ప్రయోగాల గురించి తెలిసి కొంత మంది పవర్ స్టార్ అభిమానులు కంగారు పడుతున్నారు. ఈ సినిమాను సుజీత్ 25 నుంచి 30 రోజుల లోపలే పూర్తిచేసేస్తారట. 30 రోజుల్లో చిత్రీకరణ మొత్తం పూర్తయిపోతుందని ఇండస్ట్రీ వర్గాల నుంచి వస్తోన్న సమాచారం. అంతేకాదు, ఈ సినిమాలో పాటలు కానీ, ఫైట్లు కానీ ఉండవని టాక్. పవర్ స్టార్ సినిమా అంటేనే పాటలు, ఫైట్లు, ఎమోషన్స్ కలగలిపి ఉంటాయి. అలాంటిది పాటలు, ఫైట్లు లేకపోవడం ఏంటని కొందరి ప్రశ్న. దీనికి తోడు 30 రోజుల్లోనే షూటింగ్ అవగొడతారంటే ఇంతకీ ఏం తీస్తున్నారు అని మరికొందరి ఆందోళన.
మొత్తానికి డైరెక్టర్ సుజీత్.. పవన్ కళ్యాణ్ ఫ్యాన్స్‌ను భయపెడుతున్నారు. మరోవైపు, ఇది పవన్ కళ్యాణ్ ఇమేజ్‌కి సరిగ్గా సరిపోయే కథ అని నిర్మాత డీవీవీ దానయ్య చెబుతున్నారు. దీన్ని యాక్షన్ డ్రామాగా సుజీత్ రూపొందిస్తారని స్పష్టం చేస్తున్నారు. తమన్ అద్భుతమైన నేపథ్య సంగీతం, ఇతర సాంకేతిక వర్గం ప్రతిభ తోడై అటు యాక్షన్ ప్రియులకు, ఇటు పవన్ కళ్యాణ్ అభిమానులకు ఈ సినిమా పండుగలా ఉంటుందని తెలిపారు. మరి ఫైట్లు లేకుండా యాక్షన్ డ్రామా ఎలా అవుతుంది? ఈ ప్రశ్నకు సమాధానం దొరకాలంటే కొన్ని రోజులు ఆగాల్సిందే. ఇక, ఈ చిత్రానికి ప్రముఖ సినిమాటోగ్రాఫర్ రవి కె చంద్రన్ కెమెరా బాధ్యతలు చూడనుండగా.. ఏఎస్ ప్రకాష్ ప్రొడక్షన్ డిజైన్‌ చేస్తున్నారు.
