Radha Spaces ASBL

రివ్యూ : చే గువేరా బ‌యోపిక్ ''చే''

రివ్యూ : చే గువేరా బ‌యోపిక్ ''చే''

తెలుగుటైమ్స్.నెట్ రేటింగ్ : 2.75/5
నిర్మాణ సంస్థ:  నేచర్ ఆర్ట్స్
నటీనటులు: లావణ్య సమీరా, పూల సిద్దేశ్వర్, కార్తీక్ నూనె, వినోద్, పసల ఉమామహేశ్వర్, బి.ఆర్ సభావత్ నాయక్ తదితరులు...
సంగీత దర్శకుడు : రవిశంకర్, కో డైరెక్టర్: నాని బాబు
సినిమాటోగ్రఫీ : కళ్యాణ్ సమి, జగదీష్, ఎడిటర్: శివ శర్వాణి
నిర్మాతలు: సూర్య, బాబు, దేవేంద్ర
రచయిత, దర్శకుడు: బి.ఆర్ సభావత్ నాయక్
విడుద‌ల తేదీ: 15.12. 2023

విప్లవం అన‌గానే ప్రపంచవ్యాప్తంగా అంద‌రికి గుర్తొచ్చే పేరు చేగువేరా. ప్రముఖ విప్ల‌వ‌కారుడు ఎర్నెస్టో చేగువేరా.. ధైర్యసాహసాలు, యుద్ధ నైపుణ్యం, అసాధారణ తెలివితేటలు.. ఇలా చెప్పుకుంటే పోతే ఆయన గురించి ఎంతో చెప్పుకోవచ్చు. విప్లవ వీరుడిగా, పోరాట యోధుడిగా చరిత్ర పుటల్లో సుస్థిర స్థానాన్ని సంపాదించుకున్నాడు. క్యూబాలో ఫిడెల్ క్యాస్ట్రోతో కలిసి ఆయన చేసిన పోరాటం రోమాలు నిక్కబొడుచుకునేలా చేస్తుంది. అలాంటి వీరుడి జీవిత చ‌రిత్ర‌ను తెర‌కెక్కించిన మూవీ “చే” - లాంగ్ లైవ్ ట్యాగ్ లైన్. డిసెంబ‌ర్ 15న ఈ సినిమా థియేట‌ర్‌ల‌లో విడుద‌ల అయింది. బి.ఆర్ సభావత్ నాయక్ తెర‌కెక్కంచిన ఈ సినిమా ఇటీవ‌ల ప్ర‌చార చిత్రాల‌తో వైర‌ల్‌గా మారింది. ఇంత‌కీ ఈ సినిమా ఎలా ఉంది? ఈ త‌రం ప్రేక్ష‌కుల‌కు ఎంత వ‌ర‌కు క‌నెక్ట్ అవుతుంది? రివ్యూ లో తెలుసుకుందాం.

క‌థ‌:

విప్ల‌వం బాట ప‌ట్టిన 'చే' (సభావత్ నాయక్) ప‌లు దేశాలు తిరుగుతూ పీడిత‌ జ‌నాన్ని చైత‌న్య ప‌రుస్తుంటాడు. ఒక స‌మ‌యంలో పోలీసుల ఎదురుకాల్పుల్లో గాయ‌ప‌డ‌తాడు. గాయ‌ప‌డిన 'చే'ను ఒక గిరిజ‌న గ్రామ‌స్తులు కాపాడుతారు. ఆ క్ర‌మంలో  సింగి (లావణ్య) 'చే'ను ప్రేమిస్తుంది. శ‌రీర‌కంగానూ ద‌గ్గ‌ర‌వుతుంది. ఆకలి, నిరక్షరాస్యత, అనారోగ్యం త‌దిత‌ర‌ సమస్యలపై దృష్టిపెడ‌తాడు. కేవలం కడుపు నింపుకోవటం కోసమే పని చేసే పరిస్థితి నుండి ప్రపంచాన్ని మరింత మెరుగుపరచాలని ప్ర‌య‌త్నిస్తాడు. ఈ క్ర‌మంలో పోలీసుల చేతిలో త‌న ద‌ళ స‌భ్యులు చ‌నిపోతారు. చివ‌రికి  'చే' కూడా బొలీవియా సైనిక దళాలకు బందీగా చిక్కుతాడు. ఆ త‌ర్వాత ఏమైందీ? తను ప్రేమించిన అమ్మాయి ఎలా ఉంది? అనేదే ఈ సినిమా క‌థ‌నం. వైద్యవిద్యార్థిగా ఉన్న సమయంలో చెగువేరా తన మిత్రుడు అల్బర్ట్‌ గ్రనాడోతో కలిసి మోటారు సైకిల్‌పై దక్షిణ అమెరికా ఖండంలోని దేశాలన్నిటినీ చుట్టాడు. ఆయా దేశాలలో తాండవిస్తున్న పేదరికం చెగువేరాను తీవ్రంగా కలచి వేసింది. భూస్వాముల, ధనిక రైతుల దోపిడీలు చెగువేరాకు ఆగ్రహం తెప్పించాయి. అమానుషమైన పెట్టుబడిదారీ వ్యవస్థ నాశనమయ్యేవరకూ పేదల బతుకులు మారవని గ్రహించాడు. అనుకున్నదే తడవు క్యూబన్‌ విప్లవ పోరాటంలో భాగస్వామ్యం వహించాడు.

ఫిడల్‌ క్యాస్ట్రోతో కలిసి క్యూబా విప్లవం విజయానికి వ్యూహరచన చేశాడు. క్యూబా ప్రతినిధిగా పలు దేశాలలో తిరుగుతాడు. గెరిల్లా యుద్ధతంత్రంలో చేగువేరా ఆరితేరాడు. యుద్ధభూమిలో తాను ముందు నిలబడి గెరిల్లా దళాల్ని నడిపిస్తాడు. క్యూబా  పునర్నిర్మాణంతో సంతృప్తి చెందని చేగువేరా అనంతరం కాంగో, బొలీవియాల విముక్తి కోసం ఉద్యమిస్తాడు. కానీ కాంగోలో ఇతని దళంలోని విప్లవ వీరుల ప్రయత్నాలు విజయవంతం కాదు. ఎంతో మంది చ‌నిపోతారు. ఈ కారణంగా మధ్యలోనే చేగువేరా వెనుదిరగాల్సివచ్చింది. ఆ తరువాత బొలీవియా విముక్తి పోరాటంలో పాల్గొంటాడు. చివ‌రికి బొలీవియా సైనిక దళాలకు చేగువేరా బందీగా చిక్కుతాడు. అయినప్పటికీ శత్రువుల కళ్ళలోకి చూస్తూ మాట్లాడుతాడు. తనను శత్రువులు చంపగలరేమోగానీ.. తన ఆశయాల్ని చంపలేరని నినదిస్తాడు. చేగువేరా క‌థ‌ను పూర్తిస్థాయిలో న‌డిపించిన విధానం చూడాలంటే థియేట‌ర్‌కు వెళ్లాల్సిందే.

న‌టీన‌టుల హావభావాలు :

చేగువేరా పాత్ర‌లో బిఆర్ సభావత్ నాయక్ న‌టించాడు. “న‌టించాడు” అనేదానికంటే “జీవించాడు” అంటే బాగుంటుందేమో. అంతేకాదు.. అచ్చం చేగువేరా ఇత‌డేనేమో అనుకునేలా అత‌ని లుక్ ఉంది. ఈ త‌రం ప్రేక్ష‌కుల‌కు చేగువేరా ఎలా ఉంటాడో పూర్తిస్థాయిలో చూపించాడు. లీడ్ రోల్‌లో సభావత్ నాయక్ చెప్పిన డైలాగ్‌లు ఈ సినిమా హైలైట్ పాయింట్స్‌గా చెప్పుకోవ‌చ్చు. చే కు జంట‌గా న‌టించిన‌ లావణ్య త‌న పాత్ర‌లో చ‌క్క‌గా న‌టించింది. ఒక అంద‌మైన‌ అమాయ‌క‌పు గిరిజ‌న అమ్మాయిగా న‌టించి త‌న పాత్ర‌కు ప‌రిపూర్ణ‌త తెచ్చింది. ఇక ఇత‌ర పాత్ర‌ల్లో న‌టించిన‌ పూల సిద్దేశ్వర్, కార్తీక్ నూనె, వినోద్, పసల ఉమామహేశ్వర్ త‌మ త‌మ పాత్ర‌ల‌కు న్యాయం చేశార‌నే చెప్పొచ్చు.

సాంకేతికవర్గం పనితీరు:

క‌థ క్ర‌మం కూడా దారి త‌ప్ప‌కుండా తాను రాసుకున్న‌ది తెర‌పై చూపించ‌డంలో స‌క్సెస్ అయ్యాడ‌నే చెప్పొచ్చు. చేగువేరా చెప్పే మాటలు కూడా తూటాల్లా ఉంటాయ‌ని నిరూపించ‌డానికి డైలాగ్‌లు ప‌వ‌ర్‌ఫుల్‌గా రాసుకున్నాడు సభావత్ నాయక్. చేగువేరా క్యూబా, లాటిన్ అమెరికాకు మాత్రమే పరిమితం కాదు. ప్రపంచంలో ఎన్నో దేశాలలో పోరాటాల‌కు స్ఫూర్తి అనే విష‌యాన్ని ఈ సినిమా ద్వారా సూటిగా చెప్పాడు డైరెక్ట‌ర్. ఈ సినిమాలో బ్యాక్‌గ్రౌండ్ మ్యూజిక్ మెయిన్ హైలైట్ పాయింట్‌గా నిలిచింది. రవిశంకర్ అందించిన మ్యూజిక్ సినిమాను నెక్ట్స్ లెవ‌ల్‌కు తీసుకెళ్లింది. మ్యూజిక్‌తో పాటు స‌రైన‌ సినిమాటోగ్రఫీ అందించిన‌ కళ్యాణ్ సమి, జగదీష్ ప‌నితీరు చాలా  బాగుంది. కొన్ని సీన్ల‌లో ఎడిటింగ్ లో  అక్క‌డ‌క్క‌డ చిన్న‌చిన్న క‌టింగ్ చేయాల్సింది. అయిన‌ప్ప‌టికీ ఎడిటర్ శివ శర్వాణి ప‌నితీరు ప‌ర‌వాలేదు. నిర్మాణపు విలువలు బాగున్నాయి.

విశ్లేష‌ణ‌:

అప్పుడ‌ప్పుడు ప‌వ‌న్ క‌ళ్యాణ్ కూడా చేగువేరాను గుర్తు చేస్తాడు. అదే స్ఫూర్తితో తీశాన‌ని డైరెక్ట‌ర్ బి.ఆర్ సభావత్ నాయక్ తెలిపాడు. ఈ త‌రం యువ‌త‌కు, చేగువేరా గురించి తెలియ‌ని వారికి మంచి ఆప్ష‌న్ ఈ సినిమా. ప్ర‌పంచంలో ఒక ముఖ్యమైన, అరుదైన‌ చ‌రిత్ర తెర‌పై చూసే అవ‌కాశం ఈ సినిమా క‌ల్పిస్తుంది.  ఇండియాలోనే తొలిసారి తెలుగులో తెర‌కెక్కిన సినిమా అన‌గానే ఇండ‌స్ట్రీలో ఒక్క‌సారి హాట్ టాపిక్ అయింది “చే” మూవీ. ఈ సినిమాను తెరకెక్కించిన బి.ఆర్ సభావత్ నాయక్.. ఇటీవ‌ల త‌న గురించి ప‌రిచ‌యం చేసుకున్న విష‌యం కూడా వైర‌ల్ అయింది. చేగువేరా బ‌యోపిక్‌ను సినిమాగా తీయాల‌ని 20 ఏళ్లుగా త‌పించాన‌ని, తోపుడు బండిపై మ‌ర‌మ‌రాలు అమ్ముతూ పైసాపైసా కూడబెట్టి సినిమా తీశాన‌ని చెప్పారు.

ఒక అతిసాధార‌ణ వ్య‌క్తి.. అసాధార‌ణ వ్య‌క్తి చ‌రిత్ర ఎలా తెర‌కెక్కిస్తాడో చూడాల‌న్న ఆస‌క్తి చాలామందిలో పెరిగిపోయింది. చేగువేరా జీవిత చ‌రిత్ర‌ను చిన్న‌ప్పుడే చ‌దివి, అనేక పుస్త‌కాల నుంచి ఎంతో స‌మాచారం తీసుకున్న‌ట్టు సభావత్ నాయక్ ఇప్ప‌టికే చెప్పారు. అందుకే సాధార‌ణ క‌థ‌తో పాటు, చేగువేరా లైఫ్ గురించి బ‌య‌ట ప్ర‌పంచానికి తెలియ‌ని విష‌యాల‌ను  కూడా ఎంతో ఆస‌క్తిగా తెర‌కెక్కించాడు దర్శకుడు బి.ఆర్ సభావత్ నాయక్. సినిమాలోని పాత్ర‌లు ఇండియాలో మాదిరిగానే క‌నిపిస్తాయి. ఇంకా చెప్పాలంటే గిరిజ‌నుల‌ను పోలి ఉంటాయి. చేగువేరా బ‌యోపిక్‌ను మ‌న నెటివికి దగ్గ‌రగా చూపించాల‌న్న ఉద్దేశంతోనే సినిమా తీసిన‌ట్టు మ‌న‌కు అర్థ‌మ‌వుతుంది. చేగువేరా చ‌రిత్ర ను తెర‌పై చూడాలనుకునేవారికి బాగుంటుంది.

 

 

praneet praneet praneet obili-garuda Vertex poulomi Png-jewelry
Tags :