ప్రపంచ ఆరోగ్యానికీ, విలువలకీ కొత్త దారి చూపుతున్న వెజిటేరియన్ డైట్..

మనిషి ఆహారపు అలవాట్లు కాలక్రమంలో మారిపోవడం సహజం. కొంతమంది చిన్నప్పటి నుంచీ మాంసాహారం తీసుకునేవారైనా, వయస్సు పెరుగుతున్నకొద్దీ శాకాహారాన్ని అవలంబిస్తారు. అలాగే, పుట్టుకతోనే శాకాహారులుగా ఉన్న కొందరు తరువాత మాంసాహారానికి మొగ్గు చూపుతారు. ఈ మార్పులు వ్యక్తిగత ఆలోచన, జీవనశైలి, ఆరోగ్య కారణాలపై ఆధారపడి ఉంటాయి. ఆహారం ఏదైనా — శాకాహారం (Vegetarian Diet) కావచ్చు, మాంసాహారం (Non-Vegetarian Diet) కావచ్చు — అది పూర్తిగా వ్యక్తిగత నిర్ణయం మాత్రమే.

ఇటీవలి కాలంలో ప్రపంచవ్యాప్తంగా శాకాహారం వైపు మొగ్గు చూపే వారి సంఖ్య పెరుగుతోంది. చాలామంది తమ జీవనశైలిలో మార్పులు చేస్తూ, ఆరోగ్యకరమైన జీవితం కోసం కూరగాయలు, పండ్లను ప్రాధాన్యంగా తీసుకుంటున్నారు. వైద్యులు కూడా కొందరికి వెజిటేరియన్ డైట్ (Vegan Diet) ఆరోగ్యపరంగా మంచిదని సూచిస్తున్నారు. జంతు హక్కుల పట్ల సానుభూతి చూపించే వ్యక్తులు కూడా ఈ మార్గాన్ని ఎంచుకుంటున్నారు.

ప్రపంచవ్యాప్తంగా శాకాహారం ఎక్కువగా అనుసరించే దేశాల గురించి మాట్లాడితే, భారతదేశం (India) అగ్రస్థానంలో నిలుస్తుంది. ఇక్కడ మొత్తం జనాభాలో దాదాపు 30 శాతం మందికి పైగా ప్రజలు కూరగాయలే తింటారు. ఇక రెండో స్థానంలో ఇజ్రాయెల్ (Israel) ఉంది. అక్కడ సుమారు 13 శాతం మంది ప్రజలు పూర్తిగా శాకాహారాన్ని అనుసరిస్తున్నారు.

తైవాన్‌లో బౌద్ధ ప్రభావం వల్ల జనాభాలో 12% మంది శాకాహారులు, వెజ్ రెస్టారెంట్లు విస్తారంగా ఉన్నాయి. ఇటలీలో ఆరోగ్య, పర్యావరణ అవగాహనతో 10% మంది శాకాహార వైపు మారుతున్నారు.

ఆస్ట్రియాలో 9% మంది శాకాహారులు. ప్రకృతి ప్రేమ, జంతు హింసకు వ్యతిరేక భావన వల్ల ఈ ధోరణి పెరుగుతోంది. ప్రపంచం ఆరోగ్యకర జీవనశైలిని స్వీకరిస్తోంది, శాకాహారం ఇప్పుడు విలువల ప్రతిబింబంగా మారింది.