Jagan: పీఏసీ భేటీకి సిద్ధమైన వైసీపీ.. లిక్కర్ స్కామ్ పై కీలక చర్చలు

2024 ఎన్నికల పరాజయం తర్వాత వైసిపి (YCP) ఇప్పుడు ఓ కీలక దశలో ఉంది.పార్టీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి (Jagan) ఈ నెల 29వ తేదీన తాడేపల్లి (Tadepalli) లోని పార్టీ ప్రధాన కార్యాలయంలో అత్యంత ముఖ్యమైన సమావేశాన్ని ఏర్పాటు చేశారు. ఇది పొలిటికల్ అఫైర్స్ కమిటీ (Political Affairs Committee – PAC) భేటీ కావడంతో అందరి దృష్టీ ఇప్పుడు దీనిపైనే ఉంది. ఇటీవలే పీఏసీకి కొత్త రూపాన్ని ఇచ్చిన వైసీపీ, ఈ కమిటీలో చాలా మంది సీనియర్ నేతలకు బదులుగా కొత్తవారికి చోటు కల్పించింది. ప్రతి జిల్లా నుంచి కనీసం ఇద్దరికి ఛాన్స్ ఇవ్వడంతో ఇది కీలక నాయకుల సమాహారంగా మారింది.

ఇంతకుముందు పీఏసీ ఏర్పాటయినప్పటికీ దాని కార్యకలాపాలు చాలా స్లోగా ఉండేవి. కానీ ఇప్పుడు వరుసగా సమావేశాలు నిర్వహించటం చూస్తే, పార్టీ వ్యూహాత్మకంగా ముందుకు సాగుతోందని స్పష్టంగా కనిపిస్తోంది. ఈ సమావేశం ముఖ్యంగా రాష్ట్రంలో వేడెక్కుతున్న రాజకీయాల నేపథ్యంలో జరుగుతుండటం గమనార్హం. లిక్కర్ స్కామ్ (liquor scam) పేరుతో ఆ పార్టీపై భారం పెరుగుతోంది. ఇప్పటికే ఎంపీ మిధున్ రెడ్డి (Midhun Reddy) అరెస్టు కావటం, పలువురు కీలక నేతలపై కేసులు నమోదు కావటం, అరెస్టులు జరగటం వంటి పరిణామాలు వైసీపీలో తీవ్ర ఉద్విగ్నతకు దారితీశాయి.

జగన్‌పై కూడా కేసులు పెట్టే అవకాశం ఉందన్న ప్రచారం నేపథ్యంలో ఈ సమావేశం మరింత ప్రాధాన్యతను సంతరించుకుంది. జగన్ అరెస్టు అయితే పార్టీ ఎలా స్పందించాలి, దాని తదుపరి నాయకత్వం ఎలా ఉండాలి అనే అంశాలపై ఇందులో చర్చ జరిగే అవకాశం ఉంది. ఒక వ్యక్తిపై ఆధారపడకుండా, ఒకే నేతకు బాధ్యత అప్పగించకుండా, సమూహ నాయకత్వం పద్ధతిలో పార్టీని ముందుకు తీసుకెళ్లాలని జగన్ యోచిస్తున్నట్టు తెలుస్తోంది. పీఏసీ ఇకపై ఉద్యమాలు, నిరసన కార్యక్రమాలను చేపట్టే అవకాశం ఉందని ప్రచారం జరుగుతోంది.

ఇక రాష్ట్ర రాజకీయాల్లో లిక్కర్ స్కామ్ మరింత వేడెక్కుతోంది. అధికార కూటమి వైసీపీపై మోపిన నిఘా, కేసులు రాజకీయంగా ప్రేరేపితమైనవే అని వైసీపీ నేతలు ఆరోపిస్తున్నారు. గతంలో జగన్ అరెస్టు (Jagan Arrest) అనే ప్రచారం మే నెలలో ఊపందుకున్నా, అప్పట్లో ఆగిపోయింది. కానీ ఇప్పుడు అది జరుగుతుందన్న అంచనాలు ఎక్కువవుతున్నాయి. ఈ నేపథ్యంలో వైసీపీ పీఏసీ భవిష్యత్తు నాయకత్వంలో కీలక పాత్ర పోషించే అవకాశాలున్నాయి.