మరోసారి హిందీ స్లోగన్స్‌తో ట్రంప్.. మధ్యంతర ఎన్నికల్లో విజయమే లక్ష్యం
అగ్రరాజ్యం అమెరికాలోని పలు రాష్ట్రాల్లో నవంబరు నెలలో మధ్యంతర ఎన్నికలు జరగనున్నాయి. ఈ క్రమంలో ఆయా రాష్ట్రాల్లో ఉన్న భారతీయ ఓటు బ్యాంకును కొల్లగొట్టేందుకు మాజీ అధ్యక్షుడు డొనాల్డ్ ట్రంప్ ప్రయత్నిస్తున్నారు. ఈ నేపథ్యంలోనే మరోసారి హిందీ స్లోగన్స్‌తో ప్రజల ముందుకు వస్తున్నట్లు తెలుస్తోంది. దీనికి సంబంధించిన ఒక వీడియో సోషల్ మీడియాలో తెగ వైరల్ అవుతోంది. ఈ వీడియోలో ట్రంప్ తన హిందీ స్లోగన్‌ను ప్రాక్టీస్ చేస్తూ కనిపిస్తున్నారు. ‘భారత్ అండ్ అమెరికా సబ్‌సే అచ్ఛే దోస్త్’ అనే స్లోగన్‌తో రిపబ్లికన్ పార్టీ ఈ మధ్యంతర ఎన్నికలకు వెళ్తున్నట్లు ఈ వీడియోలో కనిపిస్తోంది. అంతకుముందు 2016లో అమెరికా అధ్యక్షుడిగా ట్రంప్ గెలిచిన సమయంలో ‘అబ్ కీ బార్ ట్రంప్ సర్కార్’ వంటి స్లోగన్స్ ఉపయోగించారు. రిపబ్లికన్ హిందూ కోఅలేషన్ (ఆర్‌హెచ్‌సీ)కు చెందిన శలభ్ కుమార్ ఈ స్లోగన్స్‌ను తీసుకొచ్చారు. అయితే 2020లో ట్రంప్‌తో విభేదాలు రావడంతో ఆర్‌హెచ్‌సీ పక్కకు తప్పుకుంది. అనంతరం జరిగిన ఎన్నికల్లో ట్రంప్ ఓడిపోయిన సంగతి తెలిసిందే. ఇలాంటి సమయంలో ఇటీవల ట్రంప్ లగ్జరీ విల్లా ‘మార్ ఎ లాగో’లో ఆయన్ను కలిసిన శలభ్ కుమార్.. మరోసారి ట్రంప్‌తో చేతులు కలిపినట్లు తెలుస్తోంది. ఈ క్రమంలోనే మరోసారి ‘భారత్ అండ్ అమెరికా సబ్‌సే అచ్ఛే దోస్త్’ స్లోగన్‌తో ముందుకెళ్లాలని నిర్ణయించారు. నవంబరులో పెన్సిల్వేనియా, ఒహాయో, విస్కాన్సిన్, అరిజోనా, జార్జియా స్టేట్స్‌లో మధ్యంతరర ఎన్నికలు జరగనున్నాయి. ఈ ప్రాంతాలన్నింటిలోనూ కొద్దోగొప్పో భారతీయ కమ్యూనిటీ ఉంది. వీరిని ఆకర్షించేందుకే ట్రంప్ మరోసారి హిందీ స్లోగన్స్‌ను నమ్ముకున్నట్లు కనిపిస్తోంది. ఎలాగైనా సరే ఐదుగురు రిపబ్లికన్‌లను హౌస్ ఆఫ్ రిప్రజంటేటివ్స్‌కు పంపాలనేదే ఆ పార్టీ ఆలోచన. ఇక్కడ రిపబ్లికన్ అభ్యర్థులు గెలిచే అవకాశాలు మెండుగా ఉన్నాయని, వీటిలో కొన్ని ప్రాంతాల్లో విజేతల మార్జిన్ 5 వేల కన్నా తక్కువ ఓట్లేనని శలభ్ కుమార్ చెప్పారు. కాబట్టి ఈ ప్రాంతాల్లో ఉన్న హిందూ కమ్యూనిటీ డిసైడింగ్ ఫ్యాక్టర్ అయ్యే అవకాశం ఉందని వివరించారు.
