టీమిండియాపై టాలీ వుడ్ సినీ స్టార్స్ ప్రశంసల వర్షం

india win test series in australia

టీమిండియా చారిత్రాత్మక విజయం సాధించింది. ఆస్ట్రేలియా గడ్డపై టెస్ట్ సిరీస్‌ను సొంతం చేసుకుంది. తొలి టెస్టులో 36 పరుగులకే ఆలౌట్ అయిన ఇండియా.. ఏకంగా సిరీస్‌ను ఎగరేసుకు పోయింది.ప్రస్తుతం భారత్‌లో ప్రతి ఒక్క క్రికెట్ అభిమాని ఆనందంతో, గర్వంతో ఊగిపోతున్నాడు. తొలి టెస్టులో 36 పరుగులకే భారత క్రికెట్ జట్టు ఆలౌట్ అయినప్పుడు బోలెడన్ని విమర్శలు. ఈ జట్టా ఆస్ట్రేలియా గడ్డపై సిరీస్ గెలిచేది అన్నారు. కెప్టెన్ విరాట్ కోహ్లీ సిరీస్ మధ్యలోనే ఇండియాకు తిరిగి రావడంతో ఇక భారత్ జట్టు గెలవడం అసాధ్యమని మైఖేల్ క్లార్క్, పాంటింగ్ లాంటి ఆస్ట్రేలియన్ ఉద్దండులు బీరాలు పోయారు. కానీ, అందరి అంచనాలను పటాపంచలు చేస్తూ ఆజింక్య రహానే సారథ్యంలోని యంగ్ టీమిండియా ట్రోఫీని ఎగరేసుకు పోయింది. గబ్బాలో ఆస్ట్రేలియాను అబ్బా అనిపించే దెబ్బ కొట్టి చిరస్మరణీయ విజయాన్ని అందుకుంది.బోర్డర్‌-గవాస్కర్‌ ట్రోఫీలో భాగంగా గబ్బా వేదికగా జరిగిన నాలుగో టెస్టులో ఘన విజయం సాధించిన టీమిండియా నాలుగు టెస్టుల సిరీస్‌ను 2-1 తేడాతో కైవసం చేసుకుంది. ఆస్ట్రేలియా గడ్డపై వరుసగా రెండో సారి ట్రోఫీ గెలిచింది. 

నాలుగో టెస్టు రెండో ఇన్నింగ్స్‌లో ఆస్ట్రేలియా నిర్దేశించిన 327 పరుగుల లక్ష్యాన్ని భారత్‌ 7 వికెట్లు కోల్పోయి ఛేదించింది. శుబ్‌మన్ గిల్ (91), రిషభ్‌ పంత్‌ (89 నాటౌట్‌), ఛటేశ్వర పుజార (56), ఆజింక్య రహానే (24), వాషింగ్టన్‌ సుందర్‌(22) అద్భుతంగా ఆడటంతో భారత్ చారిత్రాత్మక విజయాన్ని నమోదు చేసింది. ఆస్ట్రేలియా గడ్డపై భారత్ సిరీస్ విజయం పట్ల భారత క్రికెట్ అభిమానులు ప్రశంసల వర్షం కురిపిస్తున్నారు. దేశ ప్రధాని నరేంద్ర మోదీ నుంచి సామాన్య ప్రజల వరకు ప్రతి ఒక్కరూ సోషల్ మీడియా ద్వారా టీమిండియాను అభినందిస్తున్నారు.

ఇక సినీ ప్రముఖులు సైతం టీమిండియా విజయాన్ని కొనియాడుతున్నారు. సూపర్ స్టార్ మహేష్ బాబు, మలయాళ సూపర్ స్టార్ మోహన్‌లాల్, సుప్రీం హీరో సాయి ధరమ్ తేజ్, RX100 హీరో కార్తికేయ, RRR మూవీ టీమ్, హీరోయిన్ ప్రణీత, బండ్ల గణేష్ సహా బాలీవుడ్ నుంచి అక్షయ్ కుమార్, సన్నీ డియోల్ ఇలా ఎంతో మంది సినీ ప్రముఖులు సోషల్ మీడియా ద్వారా టీమిండియాను అభినందించారు. హీరో కార్తికేయ కాస్త డిఫరెంట్‌గా ఇండియా-ఆస్ట్రేలియా సిరీస్‌ను రాజమౌళి సినిమాతో పోల్చారు. ‘‘ఇటీవల కాలంలో అత్యంత సంతోషకరమైన, గర్వపడిన క్షణం ఇది. ఈ సిరీస్ ఎస్.ఎస్.రాజమౌళి సార్ సినిమాకు ఏమాత్రం తీసిపోదు. ఇండియాయాయా... ఇండియా’’ అని ట్వీట్ చేశారు. టీమిండియా గబ్బాను ఊడ్చిపారేసిందని, అద్భుత విజయాన్ని అందుకుందని సాయి ధరమ్ తేజ్ పేర్కొన్నారు. ఇది న్యూ ఇండియా అని ట్వీట్ చేశారు. టీమిండియాకు మరింత శక్తి చేకూరాలని కోరుకున్నారు.

 


                    Advertise with us !!!