ఆయన ఆలోచనలు ప్రజలు అర్థం చేసుకోవాలి : ఉపరాష్ట్రపతి

Nation celebrates birth anniversary of Swami Vivekananda

పేదవారికి చేసే సేవను నారాయణ సేవగా అభివర్ణించిన వివేకానందుడి ఆలోచనలను ప్రజలంతా అర్థం చేసుకోవాలని ఉపరాష్ట్రపతి వెంకయ్య నాయుడు అన్నారు. స్వామి వివేకానంద జయంతి సందర్భంగా యువతకు జాతీయ యువజన దినోత్సవ శుభాకాంక్షలు తెలిపారు. ఈ సందర్భంగా వివేకానందుడికి ట్విటర్‌ ద్వారా నివాళులర్పించారు. భారతదేశ సంస్కృతి, ఔన్నత్యాన్ని ప్రపంచానికి చాటిచెప్పడమే కాకుండా భారతీయులను జాగృతం చేసిన గొప్ప మహనీయుడు స్వామి వివేకానందుడని కొనియాడారు. ప్రపంచ యువనికపై భారతదేశం ఓ శక్తిగా విరాజిల్లాలన్న సంకల్పంతో యువతను ఉత్తేజితం చేసి శారీరక, మానసిక దృఢత్వం, ఆత్మవిశ్వాసం, ఆధ్యాత్మికత ఆవశ్యకత కోసం ఆయన చేసిన బోధనలు అనుసరణీయమన్నారు. యువత ఈ దిశగా అడుగులు వేసి జీవితాలను ఆనందమయం చేసుకోవాలని వెంకయ్య నాయుడు సూచించారు.