ఆనంద్ దేవరకొండ హోటల్ కు బంపర్ ఆఫర్ : ఈ వీక్ ఎండ్ లో వచ్చే కస్టమర్లకు ఫిఫ్టీ పెర్సెంట్ బిల్ పే చేస్తానన్న విజయ్ దేవరకొండ

Middle Class Melodies Success Celebrations

విజయ్ దేవరకొండ తమ్ముడు ఆనంద్ దేవరకొండ ‘మిడిల్ క్లాస్ మెలొడీస్’తో తొలి విజయాన్ని అందుకున్నారు. అంతేకాదు, తొలి రెమ్యునరేషన్‌ను కూడా ఈ సినిమాతోనే అందుకున్నారు. సెన్సేషనల్ స్టార్ విజయ్ దేవరకొండ తమ్ముడు ఆనంద్ దేవరకొండ ‘దొరసాని’ సినిమాతో హీరోగా పరిచయమైన సంగతి తెలిసిందే. కానీ, తొలి సినిమా ఆనంద్‌కు విజయాన్ని అందించలేదు. అయితే, రెండో చిత్రం ‘మిడిల్ క్లాస్ మెలొడీస్’తో ఆనంద్ తొలి విజయాన్ని అందుకున్నారు. వినోద్ అనంతోజు దర్శకత్వంలో రూపొందిన ఈ చిత్రం నవంబర్ 20న అమెజాన్ ప్రైమ్ వీడియోలో విడుదలైంది. ఈ చిత్రానికి విమర్శకుల నుంచి, ప్రేక్షకుల నుంచి మంచి స్పందన వచ్చింది. ప్రస్తుతం ‘మిడిల్ క్లాస్ మెలొడీస్’ టీమ్ సక్సెస్‌ను సెలబ్రేట్ చేసుకుంటోంది. ఇదిలా ఉంటే, ఈ సినిమాతో తొలి రెమ్యునరేషన్‌ను అందుకున్న ఆనంద దేవరకొండ.. ఆ చెక్‌ను తన స్నేహితుడికి ఇచ్చేశారు. తన స్నేహితుడి రెస్టారెంట్ కలను సాకారం చేయడానికి తన చెక్‌ను అతడికి ఇచ్చేశారు ఆనంద్. ఈ విషయాన్ని ట్విట్టర్ ద్వారా ఆనంద్ వెల్లడించారు. 

‘‘మిడిల్ క్లాస్ మెలొడీస్, రాఘవ నాకు తొలి భారీ విజయాన్ని, పే చెక్‌ను అందించాయి. మా కలలను సాకారం చేసుకోవడానికి మీ ప్రేమ మాకు కొండంత అండను, ఆత్మవిశ్వాసాన్ని ఇచ్చాయి’’ అని ఆనంద్ దేవరకొండ పేర్కొన్నారు. తన స్నేహితుడి కలను నెరవేర్చడానికి తన తొలి పారితోషికాన్ని అతడికి ఇచ్చానని ఆనంద్ వెల్లడించారు. తన తొలి పారితోషికం తెర బయట మంచి ఆహారాన్ని ప్రజలకు అందిస్తుందన్నారు. ఈ వ్యాపారంలో తాము ఎదగడానికి ప్రజల సహకారం కావాలని ఆయన కోరారు. ఇంతకీ ఆనంద్ దేవరకొండ తన స్నేహితుడితో కలిసి ప్రారంభించిన హోటల్.. ‘గుడ్ వైబ్స్ ఓన్లీ కేఫ్’. హైదరాబాద్‌లో ఖాజాగూడలో పెట్టారు.

ఇదిలా ఉంటే, తన తమ్ముడు స్నేహితులతో కలిసి ప్రారంభించిన హోటల్ బిజినెస్‌కు ప్రోత్సాహకంగా నిలిచారు విజయ్ దేవరకొండ. ఈ శనివారం, ఆదివారం గుడ్ వైబ్స్ ఓన్లీ కేఫ్‌కు వచ్చే కస్టమర్లు అందరికీ సగం బిల్లు తాను చెల్లిస్తానని విజయ్ దేవరకొండ ప్రకటించారు. ‘‘నేను మంచి మూడ్‌లో ఉన్నాను. మిడిల్ క్లాస్ మెలొడీస్.. నా స్నేహితులు కేఫ్ ప్రారంభిస్తున్నారు. నేను ఏదైనా మీతోనే సెలబ్రేట్ చేసుకుంటానని మీకు తెలుసు. కాబట్టి అందరూ వచ్చేయండి. కేఫ్‌ను ఆస్వాదించండి. సగం బిల్లు నాది.. బిగ్ హగ్స్, కిసెస్ మీకు’’ అని విజయ్ దేవరకొండ ట్వీట్ చేశారు.