అవును... మేము కోర్గి సామాజిక వర్గానికి చెందినవారమే! పంది మాంసం మా సంప్రదాయ వంటకం : రష్మిక మందన

rashmika-mandanna-shares-her-coorg-culture-and-tradition-with-upasana-konidela

స్టార్ హీరోయిన్ రష్మిక తన సామాజిక వర్గం గురించి కొన్ని రహస్యాలు వెల్లడించారు. తాను కోర్గి సామాజిక వర్గానికి చెందిన అమ్మాయినని తెలిపారు. మెగా కోడలు ఉపాసన స్టార్ట్ చేసిన ‘‘యువర్ లైఫ్’’ కోసం మొన్నటివరకు సమంత గెస్ట్ ఎడిటర్‌గా వ్యవహరించిన సంగతి తెలిసిందే. ఇప్పుడు మరో స్టార్ హీరోయిన్ రష్మిక మందన గెస్ట్ ఎడిటర్‌గా ఉంటూ పలు రకాల పోషకాహార వంటలను పరిచయం చేస్తున్నారు. ‘రీచార్జ్ యువర్ లైఫ్ విత్ రష్మిక’ పేరుతో ఉపాసనతో కలిసి వీడియోలు చేస్తున్నారు. ఆరోగ్యాన్ని కాపాడుకోవడానికి తాను ఏం ఫాలో అవుతున్నానో ఆడియన్స్‌కు చెబుతూ, ఆరోగ్యకరమైన వంటకాలను వండుతూ తన స్టైల్లో ఎంటర్‌టైన్ చేస్తున్నారు రష్మిక.తాజాగా ‘చికెన్ పుట్టు కర్రీ’ వండి ఉపాసనకు రష్మిక రుచి చూపించారు. రష్మిక వంటకానికి వంద మార్కులు వేసిన ఉపాసన.. నటిగానే కాకుండా చెఫ్‌గా కూడా రష్మిక రాణిస్తుందంటూ కితాబిచ్చారు. రష్మికకు ఇంకా పెళ్లి కాలేదు కాబట్టి మంచి వంట చేసే భార్య కోసం ఎవరైనా చూస్తుంటే రష్మిక మంచి ఆప్షన్ అని ఫన్నీగా ప్రశంసించారు ఉపాసన. 

ఇదిలా ఉంటే ఈ వీడియోలో రష్మిక మందన తన సామాజిక వర్గం గురించి ప్రస్తావించారు. తాను కోర్గి (కొడవ) సామాజిక వర్గానికి చెందిన అమ్మాయినని రష్మిక చెప్పారు. ఇది ఎందుకు చెప్పాల్సి వచ్చిందంటే.. కోడిని కోర్గ్ భాషలో కోలి అని అంటారట. రష్మిక వండిన వంటకం పేరు కూడా ‘కోలీ పుట్టు’ కూర. కోడిని కోర్గిలో కోలి అంటారని రష్మిక అనగానే.. మీరు కోర్గి సామాజిక వర్గానికి చెందినవారా? మీరు పంది మాంసం ఎక్కువగా తింటారు కదా? అని అడిగారు.

దీనికి రష్మిక స్పందిస్తూ.. ‘‘అవును, పంది మాంసం మా సంప్రదాయ వంటకం. పందిని అలానే నిప్పులపై కాల్చి తింటాం. నిజానికి పంది మాంసం, వైన్‌తో మేం చాలా చేస్తాం. మేం ఇంట్లోనే వైన్ తయారు చేస్తాం. ప్రతి కోర్గి ఇంట్లో పడుకునే ముందు రెండు కప్పులు లేదా రెండు పెగ్‌ల వైన్ తాగుతారు. దీని వల్ల నిద్ర బాగా పడుతుంది. అలాగే, గుండెకు కూడా చాలా మంచిది’’ అని చెప్పారు. కాగా, రష్మిక స్వస్థలం కర్ణాటకలోని కొడగు జిల్లాలో ఉన్న విరాజ్‌పేట్ పట్టణం. కొడగు జిల్లాలో కోర్గి వర్గానికి చెందిన ప్రజలు ఎక్కువగా జీవిస్తుంటారు. కేరళ, కర్ణాటక సరిహద్దు పశ్చిమ కనుమల్లో కొడగు జిల్లా వ్యాపించి ఉంది. ఇక్కడి కోర్గి ప్రజలకు ప్రత్యేకమైన సంస్కృతి, సంప్రదాయాలు ఉన్నాయి. కోర్గి ప్రజల ఇళ్లలో ఏ వేడుక జరిగినా పంది మాంసం, వైన్ కచ్చితంగా ఉండాల్సిందే.