kcr-government-should-approach-supreme-court-to-stop-andhra-pradesh-from-taking-up-two-irrigation-projects

తెలుగు రాష్ట్రాల మ‌ధ్య జ‌ల‌వివాదాలు ముదిరి పాకాన బ‌డుతున్నాయి. గ‌త కొంత కాలంగా ఆంధ్ర సిఎం వైఎస్ జ‌గ‌న్‌, తెలంగాణ సిఎం కెసియార్‌ల మ‌ధ్య నెల‌కొన్న స‌ఖ్య‌త‌ను ఇవి ప్ర‌శ్నార్ధ‌కం చేస్తున్నాయి. పోతిరెడ్డిపాడు హెడ్ రెగ్యులేటరీ సామర్థ్యాన్ని పెంచడం ద్వారా రాయలసీమకు నీటిని తరలించాలని భావిస్తోన్న జగన్ సర్కారుకు తెలంగాణ ప్రభుత్వం తాజాగా షాకిచ్చింది. రాయలసీమ ఎత్తిపోతల పథకం వల్ల తెలంగాణకు అన్యాయం జరుగుతుందని అభ్యంత‌రం వ్య‌క్తం చేస్తూ రాయలసీమ లిఫ్ట్ ఇరిగేషన్ ప్రాజెక్టు‌పై కేసీఆర్ సర్కారు బుధ‌వారం సుప్రీం కోర్టును ఆశ్రయించింది. ఈఫైలింగ్ విధానం ద్వారా అత్యున్నత న్యాయస్థానంలో పిటిషన్ దాఖలు చేసింది. ఏపీ ప్రభుత్వం ఈ ప్రాజెక్టు విషయంలో ముందుకెళ్లకుండా చూడాలని దేశ స‌ర్వోన్న‌త న్యాయ‌స్థానాన్ని అభ్య‌ర్ధించింది. ఈ ప్రాజెక్టు విషయమై ఏపీ సర్కారు టెండరు ప్రక్రియ చేపట్టకుండా చూడాలని తెలంగాణ ప్రభుత్వం పిటిషన్‌లో కోరింది. 

శ్రీశైలం బ్యాక్‌ వాటర్‌ నుంచి కృష్ణా నీటిని అదనంగా సీమకు తరలించడం కోసం ఏపీ ప్ర‌భుత్వం రాయలసీమ ఎత్తిపోతల పథకాన్ని చేప‌ట్టింది.  ఈ ఎత్తిపోతల పథకం వల్ల తమ ప్రయోజనాలకు విఘాతం కలుగుతుందని తెలంగాణ తీవ్ర అభ్యంత‌రాలు వ్య‌క్తం చేస్తోంది. అయితే ఈ విష‌యంలో తెలంగాణ‌లోని ప్ర‌తిప‌క్షాలు ప్ర‌భుత్వం అల‌స‌త్వం వ‌హిస్తోందంటూ ధ్వ‌జ‌మెత్తాయి. పోతిరెడ్డిపాడు ప్రాజెక్టు విషయంలో కేసీఆర్ చూసీ చూడనట్లు వ్యవహరిస్తున్నారని.. జగన్‌తో స్నేహమే దీనికి కారణమని కాంగ్రెస్ ఆరోపిస్తోంది. సుప్రీం కోర్టుకు వెళ్తానని గతంలోనే చెప్పిన కేసీఆర్ ఎందుకు ఆ పని చేయడం లేదని నిలదీసింది. దీంతో ఈ విష‌యంలో జ‌గ‌న్ స‌ర్కార్‌తో ఢీ అంటే ఢీ కి కెసియార్ సిద్ధ‌మ‌య్యారు. 

పాలమూరురంగారెడ్డి ప్రాజెక్టుతోపాటు ఇతర ప్రాజెక్టులకు నీటి లభ్యత తగ్గిపోతుందని కృష్ణా నదీ యాజమాన్య బోర్డుకు తెలంగాణ సర్కారు ఇప్పటికే ఫిర్యాదు చేసింది. దీంతో అపెక్స్‌ కౌన్సిల్‌ అనుమతి లేకుండా కొత్త ప్రాజెక్టులు చేపట్టవద్దని కృష్ణా బోర్డు ఆదేశాలు జారీ చేసింది. ఆగష్టు 5న అపెక్స్‌ కౌన్సిల్‌ సమావేశం నిర్వహించేందుకు కేంద్ర జలశక్తి మంత్రిత్వ శాఖ ప్రతిపాదించింది. కానీ ముందుగా నిర్ణయించిన కార్యక్రమాలు ఉండటం వల్ల సమావేశానికి హాజరు కావడం సాధ్యం కాదని సీఎం కేసీఆర్ చెప్పారు. 

తమ వాటా నుంచి ఒక్క చుక్క తాగు నీటిని సైతం వదులుకోబోమని తెలంగాణ సీఎం కేసీఆర్ ఇదివరకే స్పష్టం చేశారు. నేడు అపెక్స్ కమిటీ సమావేశం నిర్వహిస్తామని గతంలోనే కేంద్రం తెలిపింది. ఈ తరుణంలోనే కృష్ణా నది జలాల వివాదం విషయమై తెలంగాణ ప్రభుత్వం సుప్రీం కోర్టును ఆశ్రయించడం గమనార్హం.