మిత్రుడు రజని కాంత్ గురించి అన్ని తెలిసిన వ్యక్తిగా వాడు తీసుకున్న నిర్ణయం 100 పెర్సెంట్ కరెక్ట్!
తన మిత్రుడు రజినీకాంత్ రాజకీయాల్లోకి రాకూడదని మంచి నిర్ణయం తీసుకున్నారని అన్నారు సీనియర్ నటుడు మోహన్‌బాబు. ఈ మేరకు ఓ ప్రెస్ నోట్ విడుదల చేశారు. సూపర్‌స్టార్ రజినీకాంత్ రాజకీయాల్లో యూటర్న్ తీసుకున్న సంగతి తెలిసిందే. ఈ నెల 31వ తేదీన రాజకీయ పార్టీకి అన్ని ఏర్పాట్లు చేసుకున్న సమయంలోనే రజినీ అనారోగ్యానికి గురయ్యారు. హైదరాబాద్‌లోని అపోలో ఆస్పత్రి నుంచి డిశ్చార్జయి చెన్నైలోని ఇంటికి చేరుకున్న ఆయన కుటుంబసభ్యులు, సన్నిహితుల సలహా మేరకు రాజకీయాల్లోకి రావడం లేదని ప్రకటించారు. రజినీ నిర్ణయంపై అభిమానులు తీవ్ర నిరాశకు గురికాగా.. కొందరేమో ఆయన నిర్ణయానికి మద్దతు పలుకుతున్నారు.ఈ నేపథ్యంలోనే రజినీకి అత్యంత సన్నిహితుడు, సీనియర్ నటుడు మోహన్‌బాబు కూడా రజినీకి మద్దతుగా నిలిచారు. రజినీలాంటి ముక్కుసూటి మనిషి రాజకీయాల్లో రాణించలేరని అన్నారు. రాజకీయం లాంటి రొచ్చులోకి వెళ్లి బురద అంటించుకోకూడదని రజినీ సరైన నిర్ణయం తీసుకున్నారన్నారు. ఈ మేరకు మోహన్‌బాబు ఓ ప్రెస్‌నోట్ విడుదల చేశారు.
"రజినీకాంత్ నాకు అత్యంత ఆత్మీయుడు అన్న సంగతి మీకందరికీ తెలుసు. తన ఆరోగ్య రీత్యా పాలిటిక్స్‌లోకి రావట్లేదు అని ప్రకటించాడు. ఒకరకంగా తను రాజకీయాల్లోకి రాకపోవడం మీకు, అభిమానులందరికీ బాధే అయినప్పటికీ, ఒక స్నేహితుడిగా తన ఆరోగ్యం గురించి పూర్తిగా తెలిసిన వ్యక్తిగా తాను రాజకీయాల్లోకి రాకపోవడం మంచిది అని నమ్ముతున్నాను. నా మిత్రుడితో ఎన్నో సందర్భాల్లో చెప్పాను. నువ్వు చాలా మంచివాడివి. చీమకు కూడా హాని చేయనివాడివి, నా దృష్టిలో వన్ ఆఫ్ ది గ్రేటెస్ట్ పర్సన్.. నీలాంటి వ్యక్తికి, నాలాంటి వ్యక్తికీ రాజకీయాలు పనికిరావు. ఎందుకంటే.. మనం ఉన్నది ఉన్నట్లు నిక్కచ్చిగా మాట్లాడతాం. ఎవరికి ద్రోహం చెయ్యం. డబ్బులిచ్చి ఓట్లు, సీట్లు కొనలేము... కొనము కూడా. ఇక్కడ ఎవరిని నమ్మాలో, ఎవరిని నమ్మకూడదో తెలియదు. రాజకీయాల్లోకి రానంత వరకు మంచివాడివి అన్న నోళ్లే.. రేపు వచ్చాక చెడ్డవాడిని అంటాయి. రాజకీయం ఒక రొచ్చు. ఒక బురద. ఆ బురద అంటుకోకుండా నువ్వు రాకపోవడమే మంచిది అయ్యింది. రజినీకాంత్ అభిమానులందరూ రజినీకాంత్ అంత మంచివాళ్లు. మీరందరూ సహృదయంతో నా మిత్రుడి నిర్ణయాన్ని అర్ధం చేసుకుంటారని ఆశిస్తూ.".. అంటూ ప్రెస్ నోట్ విడుదల చేసారు మోహన్ బాబు.
