మధ్యంతర ఎన్నికల్లో డొనాల్డ్ ట్రంప్ కు షాక్

మధ్యంతర ఎన్నికల్లో డొనాల్డ్ ట్రంప్ కు షాక్

08-11-2018

మధ్యంతర ఎన్నికల్లో డొనాల్డ్ ట్రంప్ కు షాక్

అమెరికా మధ్యంతర ఎన్నికల్లో డెమోక్రటిక్‌ పార్టీ మెజార్టీ స్థానాలను గెలుచుకుంది. దీంతో రిపబ్లికన్‌ పార్టీకి చెందిన అమెరికా అధ్యక్షుడు డొనాల్డ్‌ ట్రంప్‌కు ఎదురుదెబ్బ తగిలినట్లైంది. మధ్యంతర ఎన్నికల ఫలితాలు విడుదలయ్యాయి. ప్రతినిధుల సభ (హౌస్‌ ఆఫ్‌ రిప్రజెంటేటివ్స్‌)లో ప్రతిపక్ష డెమోక్రటిక్‌ పార్టీ మెజార్టీ సీట్లను సాధించింది. సెనేట్‌లో రిపబ్లికన్‌ పార్టీ ఎట్టకేలకు తమ ఆధిక్యాన్ని నిలుపుకుంది. రిప్రజెంటేటివ్స్‌ హౌస్‌, సెనేట్‌ను కలిపి అమెరికా కాంగ్రెస్‌గా వ్యవహరిస్తారు. ప్రతినిధుల సభలో 435 స్థానాలకు, సెనేట్‌లోని 35 సీట్లకు పోలింగ్‌ జరిగింది. 36 రాష్ట్రాల గవర్నర్‌ పదవులకు, ఇతర పలురకాల పదవులకు కూడా ఎన్నికలు జరిగాయి.

రిప్రజెంటేటివ్స్‌ హౌస్‌లో ఇప్పటికి 435 స్థానాల్లో 412 చోట్ల ఫలితాలు వెల్లడయ్యాయి. వీటిలో 219 స్థానాల్లో డెమోక్రాట్లు గెలుపొందగా, 193 స్థానాల్లో రిపబ్లికన్లు విజయం సాధించారు. గతంలో రిపబ్లికన్లు గెలిచిన 26 స్థానాలను ఇప్పుడు డెమోక్రాట్లు దక్కించుకున్నారు. మొత్తంగా హౌస్‌లో డెమోక్రాట్లు మోజార్టీని పొందారు. సెనేట్‌లో మాత్రం రిపబ్లికన్లు ఆధిక్యం నిలుపుకోగలిగారు. తాజాగా సెనేట్‌లో 35 స్థానాలకు ఎన్నికలు జరగగా ప్రస్తుతానికి 31 చోట్ల ఫలితాలు వెలువడ్డాయి. ఈ ఫలితాలు వెలువడిన తర్వాత సెనేట్‌లో రిపబ్లికన్లు 51 మంది, డెమోక్రాట్లు 45 మంది అయ్యారు. ఇందులో డెమోక్రాట్లు రెండు సీట్లను కోల్పోయారు. ఇంకా నాలుగు స్థానాల్లో ఫలితాలు వెలువడాల్సి ఉంది. 36 రాష్ట్రాల గవర్నర్‌ పదవులకు ఎన్నికలు జరగగా ఇప్పటికి 33 స్థానాల్లో ఫలితాలు వెలువడ్డాయి. 22 రాష్ట్రాల్లో డెమోక్రాట్లు గెలవగా, రిపబ్లికన్లు 25 స్థానాల్లో విజయం సాధించారు. అయితే డెమోక్రటిక్‌ గవర్నర్లు గతం కంటే ఏడుగురు పెరిగారు. రిపబ్లికన్లు ఏడు స్థానాలను కోల్పోయింది.